Astanada Ortalyq Azııa elderi syrtqy ister mınıstrleriniń keńesi ótip jatyr
ASTANA. KAZINFORM – Keńes otyrysyna Qazaqstan, Qyrǵyzstan, Ózbekstan, Túrikmenstan jáne Tájikstan syrtqy ister vedomstvolarynyń basshylary qatysty.
«Eń aldymen, Ortalyq Azııa elderiniń Syrtqy ister mınıstrleriniń keńesine qatysýǵa shaqyrýymdy qabyldaǵany úshin rızashylyǵymdy bildiremin. Búgingi kezdesý bizdiń ortaq qoldaýymyzdy jáne besjaqty yntymaqtastyqty odan ári nyǵaıtatyn mindetterdi aıǵaqtaıdy. Biz tóraǵalyq sheńberinde atqarylǵan birlesken jumysty qorytyndylaımyz, sondaı-aq óńirlik jáne halyqaralyq kún tártibindegi ózekti máseleler boıynsha pikir almasýymyz kerek», - dedi QR Premer-Mınıstrdiń orynbasary – Syrtqy ister mınıstri Murat Nurtileý keńestiń ashylý saltanatynda.
Sondaı-aq, mınıstr kezdesýdiń nátıjeli bolatynyna jáne Ortalyq Azııa elderi kóshbasshylarynyń sammıti tabysty ótetinine senim artty.
«Bizdiń kóshbasshylarymyzdyń saıası erki men danalyǵynyń arqasynda aımaqta senim ahýaly ornady. Jyl saıyn ózara tıimdi jan-jaqty yntymaqtastyqty tereńdetý úshin josparly jaǵdaı jasalyp jatyr. Astanada Ortalyq Azııa memleketteri basshylarynyń alǵashqy konsýltatıvtik kezdesýi ótken sátten bastap eleýli progreske qol jetkizdik», - deıdi vedomstvo basshysy.
SІM usynǵan málimetke súıensek, búginde óńir elderiniń jıyntyq JІÓ shamamen 450 mlrd dollardy quraıdy. Ózara saýdanyń turaqty ósýi qamtamasyz etildi. Sońǵy 5 jylda bul kórsetkish 80%-ǵa ósip, 11 mlrd dollarǵa jetken.
Sonymen qatar Parlamentter, qaýipsizdik keńesteri, salalyq vedomstvolar jelisi boıynsha ózara is-qımyl tetikteri, sondaı-aq áıel kóshbasshylar dıalogy iske qosylǵan.
«Bıyl biz praktıkalyq ózara is-qımyldyń jańa sapaly deńgeıine jettik. Ulttyq úılestirýshiler keńesi óz qyzmetin bastady. Óńirlik kooperatsııadaǵy qol jetkizilgen progress halyqaralyq qoǵamdastyqta da úlken qyzyǵýshylyq týdyrdy, sondaı-aq bizdiń eń jaqyn strategııalyq seriktesterimiz qoldaıdy. Buǵan Qytaı, Reseı, AQSh, Úndistan, Japonııa, Koreıa respýblıkasy, Germanııa, Italııa, sondaı-aq birqatar kópjaqty qurylymdardyń qatysýymen «Ortalyq Azııa+» formatynda ótkizilgen kezdesýlerdiń qorytyndylary dálel», - deıdi Murat Nurtileý.
Odan bólek, mınıstr Qazaqstan tóraǵa retinde konsýltatıvtik kezdesýlerdiń áleýetin odan ári nyǵaıtý boıynsha belsendi jumys júrgizgenin tilge tıek etti.
«Qaýipsizdik keńesteri hatshylarynyń, energetıka jáne aqparat mınıstrleriniń kezdesýleri, sondaı-aq Ortalyq Azııa elderi tarıhshylarynyń forýmy alǵash ret ótkizildi. Osyǵan baılanysty qazaqstandyq bastamalardy qoldaǵany jáne ónerkásip, energetıka, kólik jáne logıstıka salalarynda birqatar qujattardy daıyndaý boıynsha jemisti birlesken jumysy úshin alǵys aıtamyn», - deıdi ol.
Búgingi sammıttiń qorytyndysy boıynsha memleket basshylarynyń «Ortalyq Azııa – 2040» óńirlik kooperatsııasyn damytý tujyrymdamasyna qol qoıýy kútiledi.
«Osy qujattardy iske asyrý ózara tıimdi áriptestikti odan ári údemeli damytýǵa jáne bizdiń óńirdiń halyqaralyq sýbektıvtiligin nyǵaıtýǵa qyzmet etetinine senimdimin», - dep tolyqtyrdy SІM basshysy.
