Astanada «Orta Azııany jaýlap alý tarıhy» (kartalarmen jáne josparlarmen) 3 tomdyǵynyń tusaýkeseri ótti
ASTANA. 13 maýsym. QazAqparat - Búgin Astanadaǵy Ulttyq kitaphanada Mıhaıl Terentevtyń (1837-1909 jj.) «Orta Azııany jaýlap alý tarıhy» (kartamen jáne josparlarmen) atty úshtomdyq faksımıldik baspa týyndysynyń kórmelik tusaýkeseri bolyp ótti.
Atalǵan baspalyq ónim alǵash ret 1906 jyly Sankt-Peterbor qalasynda jaryqqa shyqqan bolatyn.
Atalǵan baspa óniminiń búgingi Qazaqstan úshin qundylyǵy zor bolyp sanalady. Óıtkeni, mamandardyń paıymynsha, onda Qazaqstan aýmaǵynda mekendegen halyqtardyń tarıhy, mádenıeti men turmysy, sondaı-aq ómir súrý qyrlarynyń basqa da erekshelikteri shynaıy ári naqty derektermen jazylyp qaldyrylǵan.
Máselen, Qazaqstannyń eńbek sińirgen ónerkásip jumysshysy, ınjener-geolog Baltabek Qýandyqovtyń aıtýynsha, «bul kitapty bizdiń baıtaq dalamyzdy saqtap, urpaǵyna amanatpen jetkizgen babalarymyzǵa eskertkish retinde sanaýǵa bolady».
Úshtomdyqty shyǵarýdy «TANARIS PRODUCTION» kınokompanııasy men QR Ulttyq akademııalyq kitaphanasy birlesip júzege asyrǵan. Al kitaptyń túpnusqasy Qazaqstannyń UAK sırek kezdesetin kitaptar men qoljazbalar qorynda saqtalǵan.
Ónimdi shyǵaryp jurtshylyqqa tanystyrý sharasy belgili kınorejısser, prodıýsser Sergeı Ázimovtyń, UAK bas dırektory Gýlısa Balabekovanyń, akademık, tarıh ǵylymdarynyń doktory Bolat Kómekovtyń, jazýshy, qoǵam qaıratkeri Mereke Qulkenovtyń bastamashylyǵymen júzege asyp otyr.
