Astanada órt týraly habar taratqan tilshige kedergi keltirildi
NUR-SULTAN. QazAqparat – Astanada «Melnıtsa» meıramhanasyndaǵy órt týraly habar taratqan «Habar 24» telearnasynyń tilshisine kedergi jasaldy, dep habarlaıdy QazAqparat.
Tilshi oqıǵa ornynan tikeleı reportaj júrgizgende ózin meıramhana ókili dep tanystyrǵan er adam kamera aldyna shyǵyp, túsirilimge barynsha kedergi jasaıdy.
«Meıramhana ókili» óz tarapynan pikir berýden de bas tartqan. Kadrǵa kıligýi týraly suraqqa «Ózgeniń qaıǵysynan jarnama jasaýdyń qajeti joq» dep jaýap bergen.
Reporterdiń aıtýynsha, tártip saqshylary tilshige kómektesýge jáne keıinirek istiń mán-jaıyn anyqtaýǵa ýáde bergen.
Aıta keteıik, QR BAQ týraly zańnyń 20-babynda jýrnalıstiń aqparatty suratýǵa, alýǵa jáne taratýǵa, memlekettik organdarǵa, barlyq menshik nysandaryndaǵy uıymdarǵa barýyna, dybys-beıne tehnıkasyn, kıno-foto túsirý quraldaryn paıdalana otyryp jazba jasaýǵa quqyly ekeni jazylǵan.
Sondaı-aq, QR Qylmystyq Kodeksiniń 158-babynda jýrnalıstiń zańdy kásibı qyzmetine kedergi jasaýǵa arnaıy jaýapkershilik taǵaıyndalǵan. Dálirek aıtqanda, 100 aılyq eseptik kórsetkishke deıingi mólsherde aıyppul salýǵa nemese sol mólsherde túzeý jumystaryna nemese 120 saǵatqa deıingi merzimge qoǵamdyq jumystarǵa tartýǵa nemese 45 táýlikke deıingi merzimge qamaqqa alý jazalary qarastyrylǵan.
Eske sala ketsek, «Melnıtsa» meıramhanasyna japsarlas salynǵan ǵımarattyń shatyry órtenip, tilsiz jaý eki saǵattan keıin sóndirildi.
QR ІІM Tótenshe jaǵdaılar komıtetiniń habarlaýynsha, shamamen 200 sharshy metr aýmaqty ot sharpyǵan.
Oqıǵa saldarynan TJ komıtetiniń Apattar medıtsınasy ortalyǵyna 2 adam kómekke júgingen. Olardyń qoly men aıaǵyn azdap kúıik shalǵan.
