Astanada órt sóndirý-qutqarý sporty boıynsha qysqy chempıonattyń ashylýy ótti
ASTANA. QazAqparat - Búgin Astanadaǵy «Qulager» sport kesheninde Qazaqstan Respýblıkasy órt sóndirý-qutqarý sporty boıynsha qysqy chempıonattyń saltanatty ashylýy ótti. 14 aqpanǵa deıin ótetin jarysqa elimizdiń óńirlerinen 28 qurama komanda qatysatyn bolady. Dúbirli dodada Astana qalasynyń TJD elordanyń namysyn qorǵaıtyn bolady, dep habarlady astana.gov.kz.
Jarys baǵdarlamasy sporttyń 2 túri boıynsha ótedi, atap aıtqanda 4-qabattyń terezesine shabýyl satysy boıynsha kóterilý (erler) jáne oqý munarasynyń 2-qabatynyń terezesine shabýyl satysy boıynsha kóterilý (áıelder), 100 metrlik kedergileri bar jolaqty júgirip ótý. Qysqy chempıonattyń saltanatty ashylý rásimine QR Іshki ister mınıstriniń orynbasary general-leıtenant V.K.Bojko, QR ІІM TJ komıtetiniń jáne Qazaqstan Respýblıkasy Órt sóndirýshiler men qutqarýshylar sport federatsııasynyń basshylyǵy qatysty. Órt sóndirý-qutqarý sporty boıynsha qysqy chempıonat elimizde atalǵan sport túrin dáripteýge, sonymen qatar, órt sóndirý-qutqarý qyzmetiniń ımıdjin kóterýge yqpal etedi. Jarys órt sóndirýshiler-sportshylardyń daǵdylaryn arttyrý men olardyń arasynan úzdigin tańdaǵannan basqa olardy biriktiredi, álemdik jáne barabar básekelestik rýhyna, salaýatty ómir saltyn ustanýǵa shaqyrady. Sonymen qatar, jarystar elorda turǵyndaryna órt sóndirý qyzmetiniń jumysynyń erekshelikterin túsinýge múmkindik berip, ózderin órt oryn alǵan jaǵdaıda qalaı ustaný kerektigin úıretedi.
