Astanada órt sóndirilgen soń 15 mln teńge joǵalý deregi tekserilýde
ASTANA. QazAqparat - Tótenshe jaǵdaılar komıtetiniń baspasóz qyzmetiniń ókilderi Astanada páter órtengen kezde iri mólsherdegi aqsha joǵalǵany jaıly jazbaǵa pikir bildirdi, dep habarlaıdy QazAqparat.
Buryn Ashat Sultanov esimdi paıdalanýshy Feısbýkte Astanadaǵy páterinde órt bolǵany týraly habarlaǵan bolatyn: «Biz tús kezinde otbasymyzben Almatyǵa ushyp kettik. 23:20-da kórshilerimiz qońyraý shaldy. Ádette úıdiń kiltin úsh kireberis aryda turatyn dosym Dáýrenge qaldyramyn. Qolma-qol soǵan habarlastym. Ol ile-shala úıge jetkende órt sóndirýshiler jumysqa kirisip, esikti ashyp jatqan eken. Dáýren esikti kiltpen ashady. Páterden qoıý qara tútin qaptaǵan soń órt sóndirýshiler adamdardy, sonyń ishinde Dáýrendi de shetke shyǵaryp, páterge kirgen».
A. Sultanovtyń aıtýynsha, úıinde áıeliniń mashınasyn satqan aqsha jáne taǵy bir dúken ashý úshin jınaǵan aqsha - 15 mıllıon teńge jáne 8 myń dollar bolǵan.
«Úıdegi aqsha bolmaı shyqqan. Dereý polıtsııa shaqyrdyq. Sol kezde saǵat túngi 01:40 edi», - deıdi A. Sultanov.
TJK baspasóz qyzmeti órt faktisin rastady.
«16 naýryz kúni 23:09-da 14 qabatty «Kóktem-2» turǵyn úıiniń №1 kireberisinen tútin shyǵyp jatqany týraly habar keldi. 23:12-de №16 arnaýly órt sóndirý bólimshesiniń kezekshi qaraýyly (16 qyzmetker jáne 2 tehnıka) jetip barǵan kezde páterlerdiń biriniń jatyn bólmesinde 10 sharshy metr aýdanda úı-turmystyq zattary jáne jıhazdar órtenip jatqan. Jalyn 23:40-ta aýyzdyqtalyp, 23:42-de tolyqtaı sóndirilgen. Aldyn ala málimetter boıynsha, órttiń tutanýyna elektr symdarynyń qysqa tuıyqtalýy sebep bolǵan».
Sonymen qatar, vedomstvonyń baspasóz qyzmetiniń ókilderiniń málimdeýinshe, úıdiń esigin Órt sóndirý qyzmetkerlerine páter ıesiniń kórshisi ashyp berip, órt sóndirilgen soń japqan. Sondaı-aq kórshi órt sóndirý qyzmetkerlerine eshqandaı kinárat joq dep qolhat ta jazyp bergen.
«Oqıǵa ornynda aqsha joǵaldy degen habar kelgen soń Órt sóndirý qyzmetiniń basshylyǵy men polıtsııa qyzmetkerleri sonda bardy. Túsiniktemeler alyndy. Tekserý júrip jatyr», - deıdi Tótenshe jaǵdaılar komıtetiniń ókilderi.
Foto: matthewalbanese.com
