Astanada órt shyqqan úıden 125 adam evakýatsııalandy, 3 bala aýrýhanada
ASTANA. QazAqparat – Astanada kópqabatty turǵyn úıdiń 2-shi qabattaǵy páterden órt shyǵyp, turǵyndar evakýatsııalandy, dep habarlaıdy QazAqparat tilshisi qalalyq tótenshe jaǵdaılar departamentiniń baspasóz qyzmetine silteme jasap.
«21 aqpan saǵat 12:26-da qalalyq tótenshe jaǵdaılar departamentine Saryarqa aýdany Qosshyǵululy kóshesi, 22/1 mekenjaıynda órt shyqqany týraly habar tústi. Oqıǵa ornyna jetken órt sóndirýshiler kópqabatty turǵyn úıdiń 2-shi qabatynda ornalasqan páterde 25 sharshy metrde jıhaz ben úı zattarynyń janyp jatqanyn anyqtady», - delingen habarlamada.
Elordalyq órt sóndirýshiler avtosaty kómegimen 26 adamdy órt aýmaǵynan aman alyp shyqty.
Onyń ishinde 13 bala bar. Jalpy sany 125-ke jýyq adam evakýatsııalandy.
«Jedel járdem brıgadasy men apattar medıtsınasy ortalyǵynyń dárigerleri 6 adamǵa, (úsheýi bala) medıtsınalyq kómek kórsetý úshin aýrýhanaǵa jetkizdi», - deıdi vedomstvodan.
Resmı aqparatta aıtylǵandaı, tilsiz jaýmen kúreske jeke quramnyń 18 mamany jáne 4 tehnıka jumyldyryldy.
Foto: QR TJM baspasóz qyzmeti
