Astanada órt shalǵan iskerlik ortalyǵynan 11 adam qutqaryldy (FOTO)
ASTANA. QazAqparat - Elordada Jeńis dańǵyly boıynda ornalasqan «Jeńis» iskerlik ortalyǵy órtenip, 11 adam qutqaryldy, dep habarlady búgin astanalyq TJD baspasóz qyzmetinen.
Qutqarýshylardyń aqparaty boıynsha, órt týraly habarlama saǵat 15.14-te kelip túsken. Oqıǵa ornyna kelgen sátte «Jeńis» iskerlik ortalyǵynyń úshinshi qabatynda 60 sharshy metr alańda úsh býtıktiń terezesi janǵan.
«Qutqarýshylardyń tyńǵylyqty jumysynyń arqasynda 11 adam qutqaryldy», - dep habarlady baspasóz qyzmetinen.
Tótenshe oqıǵadan 1974 jyly týylǵan er adam zardap shekti. Onyń denesin І, ІІ dárejeli kúıik shaldy. Órt saǵat saǵat 16.22 mınýtta aýyzdyqtaldy. Órtti sóndirýge Astana q. TJD órtke qarsy qyzmetiniń 16 tehnıkasy jáne jeke quramynan 30-ǵa jýyq adam jumyldyryldy.
«Qazir oqıǵa ornynda tergeýshiler jumys júrgizýde. Órttiń sebebi men kelgen shyǵyn kólemi anyqtalýda», - dep túıindedi baspasóz qyzmetinen.
