Astanada órt saldarynan úsh adam, onyń ishinde 1 jasar sábı mert boldy - TJM
ASTANA. 30 jeltoqsan. QazAqparat - Astanada kópqabatty turǵyn úıde bolǵan órt saldarynan úsh adam, onyń ishinde 1 jasar sábı mert boldy. Bul týraly Qazaqstannyń Tótenshe jaǵdaılar mınıstrliginen habarlady.
Órt keshe, 29 jeltoqsan kúni keshqurym Saryarqa aýdany, Avtomatıka turǵyn alabyndaǵy bes qabatty turǵyn úıdiń páterleriniń birinde boldy. 30 adam qaýipsiz jerge kóshirildi. 20 sharshy metr aýmaqqa jaıylǵan jalyn bir saǵattyń ishinde sóndirilgenimen, 2009 jyly týǵan náresteni, 23 jáne 43 jastaǵy azamattardy ajal aýzynan qutqarý múmkin bolmady. 2010 jyly dúnıe esigin ashqan taǵy bir sábı kómirqyshqyl gazyna ýlaný dıagnozymen aýrýhanaǵa jetkizildi.
Tótenshe jaǵdaıdy joıýǵa QR TJM Astana qalasy boıynsha departamenti órtke qarsy qyzmetiniń 22 adamy men 4 tehnıkasy jumyldyryldy.
