Astanada órt saldarynan múgedek bolǵan turǵynǵa 15 mln teńge tólendi
ASTANA. QazAqparat - Kóp páterli turǵyn úıde bolǵan órt saldarynan Astana turǵyny múgedek bolyp qaldy, dep habarlaıdy «QazAqparat» HAA qalalyq sot saıtyna silteme jasap.
«2009 jyly 8 mamyrda kóp páterli turǵyn úı kesheninde «S» JShS-nyń órtke qarsy qaýipsizdik erejelerin saqtamaǵandyqtan órt shyqqan.
Órttiń saldarynan uı turǵyndary japa shekti jáne olar aýyr halde aýrýhanada jetkizildi», - delingen Astana qalalyq sotynyń baspasóz qyzmetiniń habarlamasynda.
Azamat K.-ǵa birneshe ret ota jasaldy jáne ekinshi top múgedektigin aldy.
Sotta anyqtalǵandaı, jábirlenýshi tek qana Qazaqstanda ǵana emes, Germanııanyń Fraıbýrg qalasynda em alǵan.
Turǵyn úı keshenindegi órt faktisi boıynsha Astana qalasynyń Іshki ister departamenti QR QK 255 babynyń 2 bóliginde (1997 j. basylym-órt qaýipsizdigi erejelerin buzý) kózdelgen qylmystar negizinde qylmystyq is qozǵady.
Astana qalasy Almaty aýdandyq sotynyń sheshimimen «S» JShS-dan K.-nyń paıdasyna 3 787 546 teńge kóleminde materıaldyq zalal shyǵyny, 10 990 600 teńge Germanııada júrgizilgen emdeý shyǵyny, 147 781 teńge memlekettik baj somasy óndirildi.
Sheshim zańdy kúshine endi.
