Astanada órt qaýipsizdigi erejelerin buzýdyń 10 000-ǵa jýyq deregi anyqtaldy
ASTANA. KAZINFORM — Astana qalasynyń Tótenshe jaǵdaılar departamenti oqys oqıǵalardyń aldyn alý baǵytynda keshendi profılaktıkalyq jáne baqylaý sharalaryn turaqty túrde júrgizip keledi. Bul týraly Memlekettik órt baqylaý basqarmasy bastyǵynyń orynbasary Ǵabıt Babaev málim etti, dep habarlaıdy Astana ákimdiginiń baspasóz qyzmeti.
Spıkerdiń aıtýynsha, atqarylyp jatqan aýqymdy jumystarǵa qaramastan, órt oqıǵalary jıi bolyp turady. Tilsiz jaýdyń basym bóligi jeke turǵyn úı sektorlarynda bolady.
— Órtterdiń basym bóligi turǵyn úı sektorynda bolǵandyqtan, jylý berý maýsymy kezeńinde qaýipsizdik talaptaryn saqtaý máselesi erekshe nazarda. Statıstıkaǵa sáıkes, órtterdiń týyndaýy men azamattardyń qaza bolýyna ákeletin negizgi sebebi — jylytý júıeleriniń jaramsyz kúıde bolýy. Kóbine bul áleýmettik osal sanattaǵy turǵyndardyń úılerinde qoldanylatyn peshtik jylytýǵa qatysty. Atap aıtqanda, kópbalaly otbasylar, múgedektigi bar adamdar, jalǵyzilikti qarttar jáne áleýmettik jaýapkershiligi tómen tulǵalar turatyn úılerde mundaı jaǵdaılar jıi kezdesedi. Sonymen qatar, turmystyq gazdy durys paıdalanbaý da erekshe qaýip tóndiredi. Keıbir turǵyndar zań talaptaryn buza otyryp, gaz ballondaryn avtojanarmaı quıý stantsııalarynda toltyrady. Olardyń basym bóligi ýtılızatsııalaýǵa jatady jáne qaýipsizdik talaptaryna sáıkes kelmeıdi, sonyń saldarynan jarylys pen órt shyǵý qaýpi týyndaıdy, — deıdi Ǵabıt Babaev elordanyń Kommýnıkatsııalar qyzmetinde ótken brıfıngte.
Áleýmettik osal sanattaǵy turǵyndar Astana qalasynyń Tótenshe jaǵdaılar departamentiniń erekshe baqylaýynda. Qazir 1 738 otbasy esepte tur, olardyń barlyǵyna ákimdiktermen jáne eriktilermen birlesip ataýly kómek kórsetilip keledi.
Profılaktıkalyq jumys aıasynda órt týraly habarlaıtyn datchıkter ornatylyp, murjalar tazartylyp, qajet bolǵan jaǵdaıda jylytý júıelerine jóndeý jumystary júrgiziledi. Olar kómirqyshqyl gazynan ýlaný qaýpi týraly erte kezeńde eskertedi. Jylytý maýsymy bastalǵaly beri 436 ýly gaz anyqtaıtyn datchık ornatylǵan. Olardyń iske qosylýynyń nátıjesinde eki jaǵdaıda qaıǵyly oqıǵanyń aldyn alyp, 7 adamnyń ómiri saqtaldy.
Jylytý kezeńinde órtterdiń aldyn alý jáne azamattardyń qaza tabýy men jaraqat alýyna jol bermeý maqsatynda Tótenshe jaǵdaılar departamenti halyqpen aýqymdy profılaktıkalyq jumys júrgizip keledi. Búginge deıin jergilikti atqarýshy organ, polıtsııa qyzmetkerleri jáne eriktilerdiń qatysýymen 115 reıdtik is-shara uıymdastyryldy. Іs-shara barysynda 24 000-nan astam jeke turǵyn úı tekserilip, shamamen 35 000 azamatqa órt qaýipsizdigi talaptary túsindirildi. Aralaý kezinde 10 000-ǵa órt qaýipsizdigi erejelerin buzý faktileri anyqtalyp, tıisti usynystar ýákiletti organdarǵa joldanǵan.
Sonymen qatar jeke turǵyn úı sektory Departamenttiń memlekettik baqylaý obektilerine jatpaıdy, sondyqtan qyzmetkerler tek keńes berý jáne usynymdar berý aıasynda jumys júrgizedi. Keıbir jaǵdaılarda turǵyndar mamandardy úılerine kirgizýden jáne keńes alýdan bas tartady. Soǵan qaramastan, halyqty aqparattandyrý SMS-habarlamalar, úı chattary jáne múlik ıeleri birlestikteri (MIB) arqyly júrgizilip jatyr.
Astana qalasynyń Tótenshe jaǵdaılar departamenti turǵyndardy, ásirese jylytý kezeńinde, órt qaýipsizdigi talaptaryn qatań saqtaýǵa shaqyrady. Murjalardy kúıeden únemi tazalap, peshter men elektr quraldaryn qaraýsyz qaldyrmaý, tek jaramdy jylytý jabdyqtaryn paıdalaný qajet. Bir rozetkaǵa birneshe qýatty qurylǵyny qosýǵa bolmaıtynyn eskertti. Órt týyndaǵan jaǵdaıda dereý 101 nemese 112 nómirlerine habarlaý kerek. Turǵyn úıdi qysqy kezeńge daıyndaýǵa muqııat nazar aýdaryp, balalardy qaraýsyz qaldyrmaý mańyzdy. Jylytý maýsymy Departamenttiń turaqty baqylaýynda, barlyq bólimshe jedel áreket etýge daıyn.
Budan buryn SQO-da 70 jyl buryn salynyp, namazhana retinde qoldanylǵan ǵımarat órtengenin jazǵan edik.