Astanada orman sharýashylyǵy, janýarlar álemi jáne erekshe qorǵalatyn tabıǵı aýmaqtarǵa qatysty zań jobasynyń tujyrymdamasy talqylandy
ASTANA. Qazannyń 30-y. QazAqparat /Aıdar Ospanalıev/ - Búgin Aýyl sharýashylyǵy mınıstrliginiń ókilderi Astanada «Qazaqstan Respýblıkasynyń keıbir zańnamalyq aktilerine orman sharýashylyǵy, janýarlar álemi jáne erekshe qorǵalatyn tabıǵı aýmaqtar máselelerine baılanysty ózgerister men tolyqtyrýlar engizý týraly» zań jobasynyń tujyrymdamasynyń tusaýyn kesti,
dep habarlaıdy QazAqparat.
Shara barysynda atalmysh qujatqa baılanysty kirispe sóz sóılegen Aýyl sharýashylyǵy vıtse-mınıstri Marat Orazaevtyń aıtýynsha, zań jobasy kúshine enetin bolsa, Orman, Jer, Salyq jáne Ákimshilik quqyq buzýshylyqtar týraly kodeksteri men erekshe qorǵalatyn aımaqtarǵa qatysty zańdarǵa ózgerister engiziletin bolady. «Keshe Ádilet mınıstriniń basshylyǵymen 2010 jylǵa arnalǵan zań jobalarynyń josparyna baılanysty zań shyǵarý qyzmeti jónindegi vedomstvoaralyq komıssııanyń otyrysy ótti. Onda biz 2010 jyly qabyldanýy tıis zańdardyń tizimin bekittik. Jalpy, zańdardyń sany - 24. Solardyń biri - búgingi bizdiń talqylaýymyzǵa usynylyp otyrǵan zań jobasy. Búgingi otyrystan keıin biz zań jobasynyń mátinin daıyndaýǵa kirisemiz», dedi vıtse-mınıstr.
Zań jobasy elimizdiń orman sharýashylyǵy, ań sharýashylyǵy jáne balyq sharýashylyǵy qyzmeti men zańdaryna qatysty talaptardy jetildirip, olar boıynsha birqatar ózgerister men tolyqtyrýlar engizýdi qarastyrady. Osy máseleler boıynsha otyrysqa qatysýshylar ózderiniń usynys, pikirlerin ortaǵa saldy.
