Astanada orfandyq aýrýlary bar naýqastardy dárimen qamtýǵa qosymsha qarajat bólinedi
ASTANA. KAZINFORM – Jyl basynan beri Astanada 120 myń adam tegin dári-dármekpen qamtamasyz etildi. Bul týraly Astana qalasy Qoǵamdyq keńesiniń otyrysynda qalalyq Qoǵamdyq densaýlyq saqtaý basqarmasynyń basshysy Aınur Tóleýova málim etti.
Qoǵamdyq keńestiń qaraýyna Astana qalasy máslıhatynyń 2024 jylǵy 26 jeltoqsandaǵy №373/48-VIII «Astana qalasynda tirkelgen Qazaqstan Respýblıkasy azamattarynyń jekelegen sanattaryna ambýlatorııalyq emdeý kezinde tegin kepildendirilgen medıtsınalyq kómek kólemin, onyń ishinde dárilik zattardy, arnaıy emdik ónimder men medıtsınalyq buıymdardy qosymsha usyný týraly» sheshimine ózgerister men tolyqtyrýlar engizý máselesi shyǵaryldy.
– Ambýlatorııalyq deńgeıde jeńildikpen dári-dármekpen qamtamasyz etý jergilikti bıýdjet qarajaty esebinen máslıhat sheshimine sáıkes, sondaı-aq Densaýlyq saqtaý mınıstriniń 2021 jylǵy №75 buıryǵymen bekitilgen tegin dárilik zattar men medıtsınalyq buıymdar tizbesi boıynsha respýblıkalyq bıýdjet pen mindetti áleýmettik medıtsınalyq saqtandyrý júıesi esebinen júzege asyrylady. Qazirgi ýaqytta atalǵan tizimge 95 nozologııa jáne dárilik zattar men medıtsınalyq buıymdardyń 502 ataýy engizilgen. 2026 jyldyń alǵashqy bes aıynda 177 nozologııa boıynsha 120 myń naýqasqa 12,8 mlrd teńge kóleminde dárilik kómek kórsetildi. Bıyl osy maqsatqa bólingen lımıt aıasynda jalpy somasy 34,4 mlrd teńgege ótinim berildi, – dedi Aınur Tóleýova.
Onyń aıtýynsha, «Halyq densaýlyǵy jáne densaýlyq saqtaý júıesi týraly» kodekske sáıkes sırek kezdesetin orfandyq aýrýlary bar birqatar patsıent jergilikti bıýdjet esebinen dári-dármekpen qamtamasyz etiledi.
– Bıyl jergilikti bıýdjetten 64 nozologııa boıynsha eki myńǵa jýyq naýqasty qamtamasyz etý úshin 5,4 mlrd teńge bólindi. Al 2026 jylǵa qosymsha qarjylandyrý kólemi shamamen 556 mln teńgeni quraıdy, – dedi basqarma basshysy.
Talqylaý qorytyndysy boıynsha Qoǵamdyq keńes músheleri Densaýlyq saqtaý basqarmasynyń usynysyn biraýyzdan qoldady.
Eske sala keteıik, Qazaqstanda orfandyq naýqastardyń emge qoljetimdiligi qıyndap bara jatqanyn jazǵanbyz.
