Astanada oraza ustaýshylarǵa arnap kúnde aýyzashar dastarhandary jaıylady
TANA. 17 tamyz. QazAqparat /Gúlmıra Alıakparova/ - Elordadaǵy «Nur Astana» ortalyq meshitinde qasıetti Ramazan aıynyń ár kúni 500 kisige arnalǵan aýyzashar dastarhany jaıylady.
«Nur Astana» ortalyq meshitiniń naıb ımamy Tólebı Ospannyń aıtýynsha, aýyzashar dastarhany adamdar arasyndaǵy tatýlyq pen dostyqty nyǵaıtýshy bir faktor. Óıtkeni kúni boıy ash júrgen oraza ustaýshylar ýaqyt kirisimen alaqan jaıyp, Alladan duǵa tilep, bir dastarhan basynda aýyzashady. «Munyń bir kórinisi - «Nur Astana» ortalyq meshitiniń aldynda ár kúni 500 kisige berilip jatqan aýyzashar dastarhany. Bul dastarhan basyna memlekettik qyzmetkerler, is saparda júrgen jolaýshylar, qala turǵyndary men túrli áleýmettik toptaǵy adamdar jınalady. Munda olar baılyǵy men mansaby, ataǵy men abyroıyna qaramastan bir-birin quttyqtap, máre-sáre bolysady», - deıdi ol.
T.Ospannyń aıtýynsha, súıikti Alla Elshisiniń (s.a.s): «Oraza ustaǵan kisige aýyz ashtyrǵanǵa oraza ustaǵan kisiniń saýabyndaı saýap jazylady. Budan oraza ustaǵan kisiniń saýaby kemimeıdi», - degen hadısin basshylyqqa alǵan musylmandar, qalanyń ár jerinde óz nıetterimen aýyzashar dastarhandaryn jaıyp jatyr. Máselen, Ramazan aıyndaǵy aýyzashardyń bismillásin «Alasha» meıramhanasy bastap berdi. Oǵan qaladaǵy Islam dinin qabyldaǵan ózge ult ókilderi shaqyrylyp, orys tilinde ýaǵyzdar aıtyldy. Kelýshilerge orys tilindegi dinı kitaptar syıǵa taratyldy.
Onymen birge, 5 tamyzdan bastap Esil aýdanynyń ákimi Qaırat Jańabergenovtyń uıytqy bolýymen osy aýdandaǵy 20 dámhana men meıramhanada aýyzashar astary berile bastady. 29 tamyzǵa deıin jaıylatyn dastarhan basyna 1200 oraza ustaýshyny jınaý kózdelip otyr.
«Alla taǵala barshamyzǵa oraza ustaýshyǵa tán eki qýanyshtyń kelesi biri bolǵan jánnattyń Ráııan qaqpasyn qaǵýdy násip etsin!», - dep tiledi T.Ospan.
