Astanada Oraza aıt meıramy merekelik baǵdarlamalarǵa ulasatyn bolady
ASTANA. QazAqparat – Bıyl Oraza aıt merekesi qazaqı dástúrimizge saı ulttyq sporttyq oıyndardan jarystar ótkizilip, terme-jyrlar jyrlanyp, mádenı is-sharalar uıymdastyrý josparlanyp otyr.
Osy maqsatta Astanadaǵy meshitterdiń aldyna kıiz úıler qurylyp jatyr.
«Qasıetti aıdyń qýanyshyn súıinshileıtin Oraza aıt kúnderi elorda meshitterinde túrli sharalar uıymdastyrylmaq. 2014 jyldyń 28 shilde kúni saǵat 06:00-06:30 aralyǵynda qasıetti Quran aıattary oqylyp, 06:30-07:00 aralyǵynda Oraza aıtyna arnalǵan merekelik ýaǵyz aıtylyp, aıt namazynyń oqylý ereksheligi baıandalady. Saǵat 07:00-de merekelik Oraza aıt namazy oqylady. Sosyn elordalyq musylmandarǵa merekelik kóńil-kúı syılaý maqsatynda saǵat 10:00-den bastap, bas shahardaǵy «Nur Astana», «Áziret Sultan» jáne «S.Ǵylmanı» meshitteriniń aýlalaryna kıiz úıler tigilip, merekelik dastarhan jaıylady», delingen Áziret Sultan meshitiniń taratqan baspasóz baıanynda.
Osy aıtýly merekede ulttyq sporttyq oıyndardan jarystar ótkizilip, terme-jyrlar jyrlanyp, mádenı is-sharalar uıymdastyrý josparlanýda. Soǵan oraı, meshit qyzmetkerleri barsha elordalyq jurtshylyqty merekelik aıt namazyna qatysyp, mádenı sharalardy tamashalaýǵa shaqyrady.
