Astanada Oralhan Bókeıdiń «Ataýkere» dramasy orys teatry sahnasynda qoıylmaq
ASTANA. 20 maýsym. QazAqparat - 21 maýsymda Elordanyń 15 jyldyǵyna oraı M.Gorkıı atyndaǵy orys drama teatrynda qazaqtyń belgili jazýshysy, Qazaqstan Respýblıkasy Memlekettik syılyǵynyń jáne Búkilodaqtyq N.Ostrovskıı atyndaǵy syılyqtyń ıegeri Oralhan Bókeıdiń «Ataýkere» («Poslednee prıchastıe») povesi boıynsha jasalǵan qoıylymnyń premerasy bolady.
Shyǵarmanyń orys tilindegi sahnalyq nusqasyn jazǵan ǵalym, professor, jazýshy Muhamedııa Ahmet-Tóre.
Bul týraly M.Gorkıı atyndaǵy orys drama teatrynyń baspasóz qyzmeti habarlady.
«Povesterim men áńgimelerimdegi oqıǵalar meniń balalyq shaǵymnyń kýási, týǵan jer týraly estelikterge toly,- dep jazdy O.Bókeı. - Meniń qazaq jerlesterim - maqsat minezdi, taza jáne ashyq júrekti adamdar. Týǵan jerine adal, meniń jerlesterim - namysshyl, eńbekqor, adamgershiligi mol adamdar».
«Ataýkere» dramasy Otan, ata-baba ónegesi men bolashaq urpaqtyń baılanysy, adamdar arasyndaǵy kúrdeli qarym-qatynas, «kúshtiler» men «adasqandardyń» minez-qulyq qaıshylyqtary, eń bastysy kúres, mahabbat pen úmit týraly. Sonaý Altaıdyń kúmis shashbaýyndaı ıreleńdeı aqqan Buqtyrma ózeni, sol erke ózendi emip, eki jaǵalaýyna óńirdegi túımedeı qaz-qatar ornalasqan úlkendi-kishili aýyl mańynda órbigen dramalyq oqıǵa keıipkerlerin «týǵan jerge degen saǵynyshqa toly» «shynaıy jumaq álemine» nemese qol jetpes uly Muztaý shyńyna shaqyrady. Al, shynaıy jol bar ma, joq pa - ony ár adam ózi sheshedi.
«Ataýkere» qoıylymyn sahnalaýǵa tanymal qazaqstandyq rejısser, Qazaqstan Respýblıkasynyń eńbek sińirgen óner qaıratkeri Nurqanat Jaqypbaı shaqyryldy. Qoıýshy-sýretshi - QR «Mádenıet qaıratkeri» Qanat Maqsutov.
Qoıylym alǵashqy ret orys tilinde sahnalanyp, kórsetiledi. Osylaısha, gorkıılik óner sheberleri ulttyq dramatýrgııa týyndylaryn alǵashqylardyń biri bolyp orys sahnasynda sóıletý dástúrin odan ári jalǵastyrmaq.
