Astanada Opera óneriniń dúnıejúzilik konkýrsy ótkiziledi
Jıyrma besinshi ret uıymdastyrylǵaly otyrǵan Opera óneriniń dúnıejúzilik konkýrsy QR Mádenıet jáne sport mınıstrligi qoldaýymen 2017 jyldyń 24 - 29 shildesi aralyǵynda «Astana Opera» sahnasynda ótkiziledi.
- «Astana Opera» teatrynyń óner ujymy «EKSPO-2017» kórmesine oraı, este qalarlyq keremet sharalar baǵdarlamasyn ázirledi. Solardyń qatarynda «Operalııa» da bar. Maestro Domıngonyń álemdik opera ónerine qosqan úlesine baǵa jetpeıdi. Mundaı deńgeıdegi tulǵamen birge jumys jasaý - biz úshin úlken maqtanysh, - deıdi «Astana Opera» memlekettik opera jáne balet teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov.
«Operalııa» baıqaýyna 18 ben 32 jas aralyǵyndaǵy kez kelgen ánshi (bas daýsynan bastap, sopranoǵa deıin) qatysa alady. Astanaǵa dúnıejúziniń túkpir-túkpirinen 40 jýyq daryndy vokalshylar keledi. Aldyn-ala irikteý elektrondyq ótinish boıynsha 2016 jyldyń jeltoqsanynan bastap, 2017 jyldyń aqpanyna deıin júredi. Baıqaý úsh kezeńnen turady jáne maestro Domıngonyń «Astana Opera» Sımfonııalyq orkestrine jetekshilik etýimen ótetin jeńimpazdardyń gala kontsertimen aıaqtalady.
«Opera koroli» jáne «qazirgi zamannyń kórnekti opera ártisi» atanyp ketken Plasıdo Domıngo, bolashaǵynan úlken úmit kúttiretin jas ánshilerge únemi erekshe kóńil bóledi, sebebi óner jolynyń bastaýynda kezdesetin qıynshylyqty talaı óz basynan keshirdi.
- «Operalııadaǵy» meniń mindetim úzdik daýystardy iriktep qana qoımaı, bolashaqta naǵyz ártis shyǵýy múmkin degen erekshe, minezdi, akterlyq sheberligi bar ánshilerdiń talantyn ashý. Osyndaı jastar naǵyz juldyzǵa aınalady, - deıdi maestro Domıngo.
Baıqaýdyń júlde qory - 180 000 dollary. Erler men áıelder daýsy arasynda 1, 2 jáne 3 syılyq ıelerin marapattaýmen qatar, júldeler qatarynda R. Vagner jáne R. Shtraýstyń repertýarynan operany úzdik oryndaǵan úshin B. Nılsonnyń syılyǵy, úzdik oryndalǵan sarsýelalar úshin (ıspandyq operettaǵa jaqyn sahnalyq-mýzykalyq janr) Pepıta Embıl de Domıngo men úlken Plasıdo Domıngonyń syılyǵy jáne kórermen kózaıymynyń júldesi jáne t.b. bar.
«Operalııanyń» vıtse-prezıdenti Alvaro Domıngo delegatsııasymen birge elorda teatrynda boldy. Kishi Domıngo myrza, «Astana Opera» teatrynda mundaı deńgeıdegi baıqaýdy ótkizýge barlyq jaǵdaı jasalǵanyn atap ótti.
- Astanada bolǵan saparymyzdyń nátıjesine óte rızamyn. Jańa, qazirgi zamanǵa saı teatr eń sońǵy úlgidegi tehnıkamen jabdyqtalǵan: mundaǵy repetıtsııa, grımdeý zaldary, orkestr shuńqyry, sahna, bári keremet. Orkestr men hordyń joǵary deńgeıi, sondaı-aq, ár qyzmetkerdiń jumysqa degen oń kózqarasy jaǵymdy áser qaldyrdy. Teatr basshylyǵymen ótken kezdesý eki jaqqa da tıimdi boldy. Birlesken eńbegimiz jemisin berip, aldaǵy aılarda júzege asyratyn «Operalııanyń» bul shyǵarylymy, buǵan deıingilerinen de sátti ótedi dep úmittenemin, - dep qorytyndylady Alvaro Domıngo.
Alǵash ret áıgili Grand-opera sahnasynda ótken konkýrstyń negizi 1993 jyly Parıjde qalanǵanyn eske sala keteıik. Sodan beri «Operalııa» jyl saıyn túrli eldiń eń áıgili alańdarynda ótkizilip keledi. Olardyń qatarynda - ańyzǵa aınalǵan mılandyq La Skala, Londondaǵy «Kovent-Garden», Koroldik teatr (Madrıd, Ispanııa), Fılarmonıko teatry (Verona q., Italııa) jáne t.b. Ótken jyldary «Operalııada» jeńiske jetip, asqaq ónerge joldama alǵan álemdik opera sahnasynyń búgingi juldyzdary - Djoıs Dı Donato, Rolando Vıllazon, Ervın Shrott, Sonıa Ioncheva, Nına Shtemme, Hose Kýra, Djozef Kalleıa, Inva Mýla jáne basqalary.
Plasıdo Domıngonyń búkilálemdik opera ánshilerine arnalǵan «Operalııa» baıqaýyn «Rolex» kompanııasy usynady.
Baıqaýdyń talabymen jáne jańalyǵymen Operalııa saıtynda tanysýǵa bolady.
