Astanada óńirlik aýyl sharýashylyǵy jármeńkeleri bastalady
ASTANA. KAZINFORM – Elordada 19-20 qyrkúıek kúnderi óńirlerdiń qatysýymen ótetin aýyl sharýashylyǵy jármeńkeleriniń serııasy bastalyp, alǵashqy bolyp Qyzylorda jáne Atyraý oblystary óz ónimderin usynady, dep habarlaıdy Astana qalasy ákimdiginiń resmı saıty.
Jármeńkede elorda turǵyndary men qonaqtary et, balyq, sút ónimderin, kókónis, jemis-jıdek jáne basqa da azyq-túlik taýarlaryn otandyq óndirýshiler men fermerlerden tikeleı satyp ala alady.
– Jármeńke saǵat 09:00-den 18:00-ge deıin «Qazanat» ıppodromynyń avtoturaǵynda ótedi. Mekenjaıy: Qarqaraly tasjoly, 1. Jármeńke ótetin jerge №18, 37 jáne 303 avtobýstarmen barýǵa bolady, – delingen ákimdik habarlamasynda.
Óńirlik aýyl sharýashylyǵy jármeńkeleri Astanada 25 qazanǵa deıin ár demalys saıyn uıymdastyrylady.
26-27 qyrkúıekte Abaı, Almaty jáne Mańǵystaý oblystarynyń taýar óndirýshileri óz ónimderin usynady.
3-4 qazanda Shyǵys Qazaqstan jáne Aqtóbe oblystary, 10-11 qazanda Túrkistan jáne Batys Qazaqstan oblystarynyń jármeńkesi ótedi.
17-18 qazanda Soltústik Qazaqstan, Pavlodar jáne Ulytaý oblystarynyń ónimderi saýdaǵa shyǵarylsa, 24-25 qazanda jármeńke Qaraǵandy jáne Qostanaı oblystarynyń qatysýymen qorytyndylanady.
Aıta keteıik, Astanada ótetin aýyl sharýashylyǵy jármeńkesinde ónimder tıimdi baǵamen satylatyny habarlandy.
