Astanada onlaın-kazıno jelisi anyqtaldy
ASTANA. 15 sáýir. QazAqparat - Astanada qalalyq Ekonomıkalyq qylmysqa jáne sybaılas jemqorlyqqa qarsy kúres departamenti (EQSJKD) qyzmetkerleri onlaın-kazıno jelisin anyqtady, dep habarlady QazAqparat tilshisine vedomstvonyń baspasóz hatshysy Sholpan Tashetova.
«Astanadaǵy onlaın-kazıno jelisi sáýirdegi shuǵyl izdestirý is-sharalary kezinde anyqtaldy. Bir mezgilde Abaı, Kenesary, Kúıshi Dına, Brýsılovskıı kósheleri jáne Jeńis dańǵylynda ornalasqan bes oıyn orny quryqtaldy. Tekserý sátinde mekemelerde 30-dan astam adam boldy», - dedi Sh.Tashetova.
Onlaın-kazınoda uzaq ýaqyt boıy «UNIT CASH» arnaıy termınaly qyzmet atqardy. Oıynshy termınalǵa belgili bir somany engizip, arnaıy kodty tólem chegin alady jáne sodan keıin ǵana oınaýǵa kirise alady.
«Eger onlaın-kazıno klıentteri belgili bir aqsha somasyn utatyn bolsa, onda olar sol termınalǵa qaıta baryp, oıyn kodyn engizip, utys balamasyna teń somany alyp otyrǵan», - dep túsindirdi qarjy polıtsııasynyń baspasóz hatshysy.
Onyń málimetteri boıynsha, onlaın-kazınony tekserý kezinde 7 «UNIT CASH» termınaly jáne Internetke qosylǵan 106 kompıýter (júıeli bloktar), sonymen qatar 5,5 mln. teńgeden astam aqsha qarajaty anyqtalǵan jáne tárkilengen. Kompıýterlerden sondaı-aq onlaın qumar oıyndar tabylǵan. «Qazirgi sátte quqyqqa qarsy qyzmetti uıymdastyrýshylar anyqtaldy. Bul oıynhanalardyń árqaısysyna qatysty QR QK 269-1 «Zańsyz oıyn bıznesin uıymdastyrý» baby boıynsha qylmystyq is qozǵaldy, - dep naqtylady Sh.Tashetova.
