Astanada onkologııalyq aýrýlardan bolatyn ólim-jitim 1,5 esege tómendegen
ASTANA. QazAqparat - 20 jyl ishinde qalalyq densaýlyq saqtaý júıesinde medıtsınalyq-demografııalyq kórsetkishterdiń oń nátıjesi baıqalady. Osy aralyqta adamnyń ómir súrý jasy 12 jylǵa ulǵaıyp qazir 76,2 jyldy qurap otyr, dep habarlaıdy Astana qalasy ákimdiginiń resmı saıty.
Onkologııa boıynsha ótken halyqaralyq konferentsııada Astana qalasy qoǵamdyq densaýlyq saqtaý basqarma basshysy Qamaljan Nadyrov atap ótkendeı, bul elimiz boıynsha eń joǵarǵy kórsetkish. Qala halqynyń sany 4 esege ósse de onkologııalyq aýrýlardan bolatyn ólim-jitim 1,5 esege tómendegen.
«Adamdardyń qaı jerde turam degende basty tańdaýy ómir súrý qaı jerde qolaıly, qaı jerde ómir súrý sapasy joǵary, sol jerdi tańdaıdy. Qazir «Astana - deni saý jáne sportpen shuǵyldanatyn adamdar qalasy» atty tujyrymdamasy iske asyrylýda. Elbasy osy jylǵy Joldaýynda áleýmettik salaǵa basa nazar aýdardy, onyń ishinde densaýlyq salasy da bar. Sizder bilesizder, Astanada zamanǵa laıyq jańa onkologııalyq ortalyq ashý tapsyrmasy bar. Tıisinshe, bizdiń aldymyzda onkologııalyq aýrýlardyń aldyn alý, naýqastardy ońaltý jáne emdeý, jańa tehnologııalardy ázirleý men engizý mindetteri tur. Búgingi forým bizdiń salamyzdyń damýyna tıisti áserin beredi degen oıdamyn», - dedi ol.
№ 1 qalalyq onkologııalyq ortalyǵynyń hırýrgııa bólimshesiniń meńgerýshisi ıÝrıı Jýkov, qalada jalpy elimizde sút bezi, jatyr moıny, óńesh, asqazan obyry onkologııalyq aýrýlardyń aldyn alý maqsatynda skrınıngtik zertteýler baǵdarlamasy iske asyrylyp jatqanyn aıtty.
«Patsıentter turaqty profılaktıkalyq tekserýlerden ótýde jáne ol úshin barlyq jaǵdaı jasalǵan. Sonyń arqasynda jaman aýrýdyń aldyn alyp bastapqy kezeńde anyqtap durys em jasap, emdeýge múmkindik bar. Mysaly, sút bezi obyry boıynsha aýrýdyń 80 %-y bastapqy 1 jáne 2 satysynda anyqtalýda, sol sebepti de emdeýdiń nátıjesi jaqsy bolýda», - dedi ol.
Aıta keteıik, 12-13 qazan kúnderi Astanada onkologııa jáne pallıatıvtik kómek suraqtary boıynsha halyqaralyq konferentsııasy ótýde. Shara Onkologtar men radıologtar qaýymdastyǵy jáne Astana qalasy ákimdiginiń onkologııalyq ortalyǵynyń is-sharalar josparyna sáıkes, sondaı-aq, «Qazaqstan Respýblıkasynda 2017-2019 jyldarǵa arnalǵan pallıatıvtik kómekti damytý jol kartasyn» ári qaraı jyljytý maqsatynda ótýde.
