Astanada óner kolledjderiniń ónerpazdary jyldyq qorytyndy kontsertterin ótkizdi

Bıyl sharaǵa elimizdiń A.V.Seleznev atyndaǵy Almaty horeografııalyq ýchılışesi, O.Tańsyqbaev atyndaǵy Sándik-qoldanbaly óner kolledji, J.Elebekov atyndaǵy respýblıkalyq estrada-tsırk kolledji jáne P.Chaıkovskıı atyndaǵy Almaty mýzykalyq kolledjiniń stýdentteri qatysýda.

"Óner kolledjderiniń ujymdary jyldyq jumystarynyń qorytyndysy retinde kontsert uıymdastyrady. Bul bastamany byltyr QR Bilim jáne ǵylym mınıstri kóterip, ony elimizdiń elordasy - Astanada ótkizý jóninde usynys aıtqan bolatyn. Jáne ol - Qazaqstan Respýblıkasynyń Táýelsizdik kúni merekesine arnalǵan. Osy iske biz barlyǵymyz kásibı turǵyda kúshti daıyndyqpen keldik",-deıdi A.V.Seleznev atyndaǵy Almaty horeografııalyq ýchılışesiniń dırektory Talǵat Andaspaev.

Ár kolledj óziniń san-salaly kontserttik baǵdarlamasyn daıyndaǵan. Máselen, A.V.Seleznev atyndaǵy Almaty horeografııalyq ýchılışesi Astanaǵa balet, qazirgi zaman jáne Qazaqstandaǵy dıasporalardyń ulttyq bılerin alyp kelgen. J.Elebekov atyndaǵy respýblıkalyq estrada-tsırk kolledji bolsa, sırek janrlardyń biri - tsırk qoıylymdaryn, estrada, bı jáne qazaqtyń dástúrli ónerin usyndy. Al P.Chaıkovskıı atyndaǵy Almaty mýzykalyq kolledji estrada jáne tsırk, horeografııalyq, klassıkalyq bı, qazaq ulttyq aspaptary men sımfonııalyq orkestri, hor ujymymen ónerlerin pash etti.

"Shara Qazaqstannyń jas urpaǵyn tárbıeleýge úlken serpin beredi. Olar bolashaq ártister, sýretshiler men zergerler, elimizdiń mádenıetiniń ókilderi. Táýelsizdik memlekettik merekesine arnalǵan kontsertter óz eline, jerine, halqyna, prezıdentine degen mahabbatty bildirýge yntalandyryp qana qoımaıdy, sonymen qatar jas ónerpazdarǵa óz talantyn kórsetýge de múmkindik beredi",-deıdi P.Chaıkovskıı atyndaǵy Almaty mýzykalyq kolledjiniń dırektory Aıa Galıeva.