Astanada «Óner álemi» shyǵarmashylyq forýmy ótedi
ASTANA. 15 naýryz. QazAqparat - 20 naýryz kúni QazUÓÝ Organ zalynda 19.00-de saltanatty túrde Qazaqstannyń fılarmonııalar birlestiginiń shyǵarmashylyq yntymaqtastyǵy týraly Memorandýmǵa qol qoıý rásimi men «Óner álemi» atty kontsert ótedi, dep habarlady osy birlestiktiń baspasóz qyzmeti.
Qazaqstan Respýblıkasynyń Prezıdenti N.Á.Nazarbaev 2012 jylǵy 10 shildedegi «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty baǵdarlamalyq maqalasynda oblystar arasyndaǵy mádenı jetistikter men aqparattar almastyrýdy kúsheıtý qajettiligi týraly aıtqan bolatyn.
Atalǵan baǵdarlama aıasynda Astana qalasy ákimdiginiń Memlekettik fılarmonııasynyń bas dırektory jáne kórkemdik jetekshisi Sáken Ábdirahmanov Qazaqstannyń fılarmonııalar birlestigin qurý ıdeıasyn usyndy jáne bul bastama shyǵarmashylyq ujymdardyń qoldaý kórsetýimen júzege aspaq.
Qazaqstannyń fılarmonııalar birlestiginiń shyǵarmashylyq yntymaqtastyǵy týraly Memorandým orkestrler, vokalıster, mýzykanttar jáne dırıjerlarmen almasý, aımaqtyq oryndaýshylyq mektepterdiń kontsertin jáne birlesken kontsertter ótkizý arqyly álemdik jáne otandyq mýzyka jaýharlaryn dáripteýdiń, Qazaqstan mádenıetiniń mýzykalyq murasy men dástúrleri saqtalýynyń, shyǵarmashylyq tájirıbe almasýdyń negizin qalaıdy.
Atalmysh memorandým yqpaldastyq arnalaryn keńeıtip, fılarmonııalardyń ózara tájirıbe almasýyna, Qazaqstanda fılarmonııalar birlestiginiń áleýetti shyǵarmashylyq bazasyn qurýǵa múmkindik týǵyzady. Qujat fılarmonııalardyń shyǵarmashylyqtyń damýyna jaǵdaı jasaıtyn erkin keńistikti qalyptastyrý mindeti týraly tujyrymdy bekitedi. Elordada dúnıege kelgen bul bastama jýyq arada Qazaqstannyń barlyq aımaqtyq fılarmonııalaryn biriktiretinine senim mol.
Alǵashqy birlesken joba - «Óner álemi» kontsertinde Astana qalasy ákimdigi Memlekettik fılarmonııasynyń sımfonııalyq orkestri, Qazaqstannyń fılarmonııalar birlestiginiń dırıjerlary men solısteri qatysady. Kesh barysynda V.A.Motsart, J.Massne, A.Dvorjak, N.Rımskıı-Korsakov, E.Brýsılovskıı jáne t.b. kompozıtorlardyń shyǵarmalary oryndalady.
