Astanada ónegeli otbasy ókilderimen kezdesý ótpek
Astana. 5 qyrkúıek. QazAqparat - Erteń «Shabyt» Qazaq ulttyq óner ýnıversıtetiniń kontserttik zalynda, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń (budan ári - Ulttyq komıssııa) uıymdastyrýymen «Maqtanym, tiregim - otbasym» atty ónegeli otbasylar ókilderimen kezdesý ótedi.
Bul týraly Ulttyq komıssııanyń baspasóz qyzmetinen habarlady.
Bıyl elimizde qyrkúıektiń ekinshi jeksenbisinde alǵash ret atalyp ótkeli otyrǵan Otbasy kúni merekesi qarsańyna oraılastyrylyp jatqan is-sharanyń maqsaty - otbasy ınstıtýtyn, ımandylyqty, rýhanılyqty nyǵaıtýǵa, jaýapkershilikti erli-zaıyptylyqtyń mańyzdylyǵyn tanýǵa járdemdesýge negizdelgen.
Kezdesýge QR Prezıdentiniń keńesshisi, Ulttyq komıssııanyń tóraıymy G.N.Ábdiqalyqova qatysady. Sondaı-aq, tanymal qoǵam jáne memleket qaıratkerleri shaqyrylǵan.
Otbasylyq-demografııalyq saıasattyń mańyzdy quraýyshy retinde otbasylyq qundylyqtardy, jaýapkershilik pen ásirese kóp balaly bolýdy halyq sanasyna sińirý basty memlekettik mindetterdiń biri bolyp tabylady.
Árbir qazaqstandyq otbasy men árbir qazaqstandyqtyń ómirine shynaıy sezinerlikteı oń ózgerister ákelýge baǵyttalǵan naqty qadamdar jasalýda. Endigi kezek - azamattardyń ózinde, árqaısymyzdyń sol bastamalardy ilgeriletýge úles qosýymyzda. Bul kezdesý qoǵamnyń ár múshesiniń otbasy ınstıtýtyn qoldaý úshin óz deńgeıinde eńbek ete alatynyn kórsetýge arnalǵan.
Kezdesýdiń basty keıipkerleri - Qazaqstannyń túkpir-túkpirinen kelgen, Otanymyzdyń órkendeýine eńbegimen de, ónegeli ul-qyzymen de úles qosyp júrgen ata-analar - «Otbasym» jýrnalynda jarııalanǵan materıaldardyń keıipkerleri. Otbasylyq qundylyqtardy nasıhattaý úshin naqty adamdar ómirin ónege ete otyryp, kezdesý keıipkerleriniń otbasylyq tárbıe, áke men anany qadirleý, sapaly, sanaly urpaq ósirý boıynsha ómirlik tájirıbeleri nasıhattalyp, qurmet kórsetiledi. Sondaı-aq jas urpaqtyń boıyna ósken uıasyn qasterleý, ul-qyzy úlgi tutar ata-ana bolý sezimin darytý kózdeledi.
