Astanada óndiristik jaraqattanýdyń aldyn alý sharalary kúsheıtildi
ASTANA. KAZINFORM — Astana qalasynyń prokýratýrasynda qala prokýrory Ǵabıt Muqanovtyń tóraǵalyǵymen Úılestirý keńesiniń otyrysy ótkizildi, dep habarlaıdy vedomstvonyń baspasóz qyzmeti.
Otyrys barysynda 2023–2025 jyldar aralyǵyndaǵy óndiristik jaraqattanýdyń aldyn alý máseleleri qaraldy. Bul máseleniń ózektiligi saqtalyp otyrǵany jáne baqylaýdy kúsheıtýdi, sondaı-aq vedomstvoaralyq ózara is-qımyldy arttyrýdy talap etetini atap ótildi.
Otyrys qorytyndysy boıynsha naqty sheshimder qabyldandy. Polıtsııa departamentine óndiristik jaraqattanýdyń barlyq faktilerin mindetti túrde tirkeýdi qamtamasyz etý jáne olardy jasyrýǵa jol bermeý tapsyryldy.
— Memlekettik eńbek ınspektsııasy organdaryna jumys berýshilerdiń jaýapkershiligin kúsheıtý, tekserýlerdiń merzimderin saqtaý jáne profılaktıkalyq jumysty jandandyrý júkteldi. Densaýlyq saqtaý basqarmasyna jaraqattar týraly aqparatty quqyq qorǵaý organdaryna berý boıynsha biryńǵaı algorıtm engizý tapsyryldy, — delingen habarlamada.
Sonymen qatar, vedomstvoaralyq mobıldi toptar qurý, tsıfrlyq sheshimderdi engizý jáne tekserýlerdiń zańdylyǵyna baqylaýdy kúsheıtý, onyń ishinde toqtatylǵan isterdi qaıta qaraý kózdeldi.
Berilgen tapsyrmalardyń oryndalýy erekshe baqylaýǵa alyndy. Qala prokýratýrasy eńbek qaýipsizdigin qamtamasyz etý jáne azamattardyń quqyqtaryn qorǵaý baǵytyndaǵy jumysty jalǵastyrady.
Osyǵan deıin óndiristik jaraqat alǵan adamǵa ótemaqy qalaı esepteletinin jazdyq.
