Astanada óndiristik jaraqattaný azaımaı tur: 2 adam qaza tapty
ASTANA. KAZINFORM — Elordada qabyldanyp jatqan sharalarǵa qaramastan óndiristik jaraqattaný máselesi áli de ózekti. Bul týraly QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıtetiniń Astana qalasy boıynsha departamentiniń basshysy Erlan Ismaǵulov málimdedi.
Onyń aıtýynsha, 2026 jyldyń basynan beri óndiriste 11 jumysker zardap shekken. Onyń ishinde 2 oqıǵa adam ólimimen aıaqtalyp, 9 jumysker aýyr jaraqat alǵan. Sonymen qatar jeńil jáne ortasha deńgeıdegi 22 oqıǵa tirkelgen.
— Jaraqat alý derekteri eń kóp tirkeletin sala — qurylys. Bul salada eńbekti qorǵaý talaptarynyń júıeli túrde buzylatyny anyqtalyp otyr, — dedi Erlan Ismaǵulov.
Onyń sózinshe, negizgi sebepterdiń qatarynda jumyskerlerdi eńbek shartynsyz jumysqa tartý, mindetti saqtandyrýdyń bolmaýy, aqaýly tehnıkany paıdalaný jáne qaýipsizdik talaptaryn saqtaý deńgeıiniń tómendigi bar. Ásirese qosalqy merdiger uıymdardyń jumysy alańdatady. Kóp jaǵdaıda mundaı uıymdarda eńbekti qorǵaý qyzmeti uıymdastyrylmaǵan, qaýipsizdik boıynsha nusqama berilmeıdi, jumyskerler jeke qorǵanys quraldarymen tolyq qamtylmaıdy.
Osyǵan baılanysty óndiristegi qaýipsizdikti kúsheıtý baǵytyndaǵy jumys jalǵasyp jatyr.
— Memlekettik eńbek ınspektorlary prokýratýra organdarymen jáne kásipodaqtarmen birlesip, eńbek ujymdarymen kóshpeli kezdesýler ótkizip keledi. 2025 jyly 73-ten astam is-shara uıymdastyrylyp, 4 400-den astam qyzmetker qamtyldy, — dedi Erlan Ismaǵulov.
Onyń aıtýynsha, jazataıym oqıǵalar týraly jedel aqparat alý úshin «iKomek 109» qyzmetiniń WhatsApp-chaty jumys isteıdi.
— Bul arna arqyly óndiristegi jazataıym oqıǵalar týraly habarlamalar jedel qabyldanyp, tıisti sharalar qabyldanady, — dedi ol.
Aıta keteıik, buǵan deıin óndiriste jaraqat alǵan qyzmetkerge ótemaqy qalaı esepteletini týraly jazǵan edik.
