Astanada óndiristik jaraqat alý jaǵdaılary jıilep barady
ASTANA. 6 tamyz. QazAqparat - Astanada qurylys jáne ónerkásip nysandarynda óndiristik jaraqat alý jaǵdaılary jıilep ketti. Bul týraly astana.kz saıtyna Tótenshe jaǵdaılar departamentinen habarlanǵan.
Departament málimetterine qaraǵanda, jyl basynan beri 69 tótenshe jaǵdaı tirkelse, sonyń ishinde 42 adam qurylys jáne ónerkásiptik nysandarda bıikten qulap, altaýyn elektr togy soqqan. Qurylys alańdarynda 13 adam jan tásilim etse, 58 adam aýrýhanaǵa jatqyzyldy.
«22 maýsymda Almaty aýdanynda jumys júrgizý barysynda dánekerleýshi joǵary voltty jeliler ornyna qulaǵan. Ol medıtsınalyq járdem kelip jetkenshe alǵan jaraqattardan kóz jumdy. 27 shildede Esil aýdanynda da osyndaı oqıǵa oryn alǵan. «KAMAZ» kóliginiń júrgizýshisi shanaǵymen elektr symdaryna tıip ketip, tok soǵýdyń saldarynan jan tapsyrǵan. 30 shildede dánekerleý jumystaryn júrgizý kezinde jumysshyny tok soqqan» delingen baspasóz baıanynda.
Sonymen qatar, departament derekterine qaraǵanda, jumyskerlerdiń bıikten qulaý jaǵdaılary da artyp otyr. Máselen, sáýir aıynda Almaty aýdanynda 6, Esil aýdanynda 5 jumysshy qulap, bireýi qaza tapqan. Zardap shekkenderdiń bári 20-30 jas shamasynda.
«Montajdaýshy, sylaqshy, tasshy mamandar 2-shi jáne 3-shi qabattardan jıi qulaıdy. Bul qurylys jáne ónerkásiptik nysandarda jumystar júrgizý barysynda qaýipsizdik tehnıkasyn saqtaý, kún saıyn nusqalar berý, merdigerlik uıym jetekshilerine qyzmetkerlerdiń qaýipsizdigin qamtamasyz etýdi kúsheıtý qajettiliginiń belgisi» delingen aqparatta.
