Astanada «Óndiris» turǵyn alabynda bos jumys oryndar jármeńkesi ótýde
ASTANA. 29 qazan. QazAqparat - Búgin «Óndiris» turǵyn alabynda ótip jatqan bos oryndar jármeńkesine 5 jumys berýshi shaqyryldy.
«Óndiris» turǵyn alabynyń jumyssyz júrgen turǵyndaryn qamtý úshin búgingi jármeńkeni osynda ótkizýge sheshtik. 5 uıym shaqyryldy, negizinen, qurylys sektorynan. Sebebi, Astana ósip-órkendep keledi. Jumys berýshiler tarapynan qurylysshylarǵa degen suranys kóp», - dedi Astana qalasy ákimdigi «Jumyspen qamtý ortalyǵy» QMM jumyssyzdardy qabyldaý jáne jumysqa ornalastyrý bólimi basshysynyń orynbasary Ulan Naýshabekov. Bul týraly astana.kz habarlady.
Budan basqa, jármeńkede Saryarqa aýdanynyń prokýrory Erkebolat Serikbaev «Óndiris» turǵyn alabynda kóshpeli qabyldaý júrgizip, azamattarǵa áleýmettik máseleler (turǵyn úımen qamtý, járdemaqylar taǵaıyndaý jáne t.b.) boıynsha keńester berdi.
Sonymen qatar, jármeńkede Jumyspen qamtý ortalyǵynyń mamandary túrli máseleler boıynsha keńes beredi, qaıta oqytý jáne jańa mamandyq alýdyń múmkindikteri, oqý oryndarynyń túlekterine jastar tájirıbesinen ótý múmkindikteri týraly jáne jalpy «Jumyspen qamtý jol kartasy - 2020» baǵdarlamasy sheńberinde basqa da memlekettik qoldaýlar týraly aıtylýda.
