Astanada on jylǵa sozylǵan saýda ortalyǵynyń qurylysy qashan aıaqtalady
ASTANA. QazAqparat – Elordada Respýblıka dańǵyly men Imanov kóshesiniń qıylysynda saýda jáne oıyn-saýyq ortalyǵynyń qurylysy birneshe jyldan beri aıaqtalmaı keledi. Saýda ortalyǵy qurylysynyń uzaqqa sozylýyna ne sebep, ol qashan bitedi? QazAqparat tilshisi suraqty qalalyq ákimdikke joldaǵan edi.
Elorda ákimdiginiń baspasóz qyzmeti banktik ınvestıtsııalar boıynsha aýyrtpalyqtarǵa baılanysty (Jusan Bank) «Sıtı Palas» saýda, oıyn-saýyq ortalyǵy qurylysynyń toqtatylǵanyn habarlady.
«Búginde atalǵan nysanǵa tapsyrys berýshi «Merey real estate managment» JShS qurylysty aıaqtaý úshin jeke ınvestıtsııa tartý máselesin pysyqtap jatyr. Búgingi tańda nysan 60% daıyn», - delingen habarlamada.
Qurylysy bitse, jańa saýda ortalyǵynda dúkender, dámhana men meıramhanalar, kınoteatr bolady. Ortalyq saýda, oıyn-saýyq, demalys jáne qarym-qatynas úshin ártúrli múmkindikter usynady. Nysannyń 0 qabatynda 190 kólikke arnalǵan turaq, tehnıkalyq úı-jaılar ornalaspaq.
Birinshi qabatta saýda jáne qosalqy oryndar, 209 kólikke arnalǵan parkıng, qoıma jáne qyzmettik-turmystyq úı-jaılar bolady. Ekinshi jáne úshinshi qabattarda – saýda býtıkteri, qosalqy jáne qyzmettik-turmystyq oryndar, 285 oryndyq parkıng, qoıma úı-jaılary.
Tórtinshi qabatta qysqy baq, saýda oryndary, 370 tamaqtaný oryndary (fýdkort), 200 oryndyq meıramhana, oıyn-saýyq aımaǵy ornalasady.
Besinshi qabatta jalpy syıymdylyǵy 1 494 oryndyq (7 zal) kınoteatr jáne saýda býtıkteri ornalasady. Saýda zaldarynda bir mezgilde 50% toltyrýmen 7 943 adam syıady.
