Astanada on saýsaǵynan óneri tamǵan zergerdiń kórmesi ashyldy
ASTANA. QazAqparat - Búgin Astanadaǵy Qazaqstan Respýblıkasy Tuńǵysh Prezıdent Mýzeıinde belgili zerger, Halyqaralyq Karl Faberje Ordeniniń ıegeri, QR Eńbek sińirgen qaıratkeri Berik Álibaıdyń «Halyq qazynasynyń murageri» atty jeke kórmesi ashyldy.
Kórmeniń ashylý saltanatyna QR Mádenıet jáne sport mınıstri Arystanbek Muhamedıuly, QR Tuńǵysh Prezıdenti Mýzeıi dırektorynyń orynbasary Kúlaısha Aqtaeva, sýretshi-zerger Estaı Daýbaev, QR Mádenıet qaıratkeri Jeńis Kákenuly jáne basqa da óner ıeleri qatysty.
«Berik Álibaıdyń búkil ómir joly osy óner salasynda ótip keledi. Ol óziniń eńbegimen, talantymen, elge degen erekshe yntasymen birqatar jetistikke jetip júrgen azamat. Onyń sheberhanasyna kirgen adam qaıtip shyqqysy kelmeı qalady. Nege deseńiz, qol óner buıymdary men zergerlik buıymdardyń kózdiń jaýyn alatyn neshe túrlisi osynda. Búgingi kórmege de osy sheberimizdiń qolynan shyqqan qundy buıymdar qoıylyp otyr. Sondyqtan olardy tamashalaımyn degen ár adamǵa erekshe áser etetini sózsiz», - dep atap ótti kórmeni ashyp bergen mınıstr A. Muhamedıuly.
Kórmede B. Álibaıdyń avtorlyq zergerlik jumystary eki kórme zalyna qoıylǵan. Onla qazaq batyrlarynyń qarý-jaraqtaryn, sondaı-aq dástúrli qazaq qoǵamyna tán handardyń bılik nyshany bolyp tabylatyn asataıaqtardy kórýge bolady. Sonymen qatar qazaq qyzdarynyń áshekeı buıymdary, qos bilezikter, syrǵalar, boıtumarlar, óńirjıekter, júzikter qoıylǵan. Eksponattardyń barlyǵy kóbine marjan, malahıt, laǵyl, aqyq syndy asyl tastarmen bezendirilgen.
«Kórmege sońǵy on shaqty jyldaǵy qolymnan shyqqan eńbekterim qoıylyp otyr. Olardyń keıbiri on shaqty jyl boıy osy mýzeıde turǵan eksponattar. Máselen Astananyń alǵashqy toıynda Elbasyǵa syılanǵan asataıaǵym da búgingi kórmede tur», - deıdi kórme avtory B. Álibaı.
Aıta keteıik, zergerdiń qolynan shyqqan buıymdar «Táýelsizdik Saraıyndaǵy» etnografııa jáne qoldanbaly óner galereıasynda, QR Tuńǵysh Prezıdenti Mýzeıinde, QR Ortalyq memlekettik mýzeıinde jáne QR Ulttyq mýzeıi qorlarynda, sondaı-aq jeke kollektsıonerler men sheteldik galereıalarda saqtaýly.
B. Álibaı 2013 jyly Sankt-Peterbor qalasynda Karl Faberje halyqaralyq memorıaldyq qorynyń «Eńbegi sińgen zerger» gaýhar tasty Ordenimen jáne 2014 jyly «Musylman áleminiń qurmetti zergeri» ordendik belgisimen marapattalǵan.
Kórme 15 jeltoqsanǵa deıin jalǵasady.
