Astanada ómir súrý kúrt qymbattady
ASTANA. QazAqparat - Aǵymdaǵy jyly elordada ómir súrý kúrt qymbattap ketti. Bir jyldyń ishinde tutyný baǵasynyń ósimi 13,2 paıyzdy qurady. Degenmen Qazaqstandaǵy ınflıatsııa qarqyny osy jyldyń ishinde birshama baıaýlap otyr, dep habarlady ranking.kz.
Aǵymdaǵy jyly elimizde negizgi tutyný taýarlary men qyzmetterdiń baǵasy tóńiregindegi jaǵdaı 2016 jylmen salystyrǵanda birshama turaqty. Osymen ekinshi aı qatarynan eldegi ınflıatsııa kólemi 0,5 paıyzdan asqan joq. Salystyrý úshin aıtar bolsaq, 2016 jyldyń sáýirinde Qazaqstanda taýarlar men qyzmetterdiń baǵasy 0,6 paıyzǵa ósken bolatyn.
2017 jyldyń birinshi toqsanynda azyq-túlik ónimderiniń, azyq-túlik emes taýarlarynyń jáne aqyly qyzmetterdiń baǵasy ótken jyldyń sáıkes kezeńimen salystyrǵanda 7,7 paıyzǵa artty. Bul ótken jylǵy tutyný baǵalarynyń ósim deńgeıinen (15,4 paıyz) shamamen 2 esege tómen.
Aǵymdaǵy jyly azyq-túlik taýarlary baǵasynyń ósimi qarqyndy bólip, 2016 jyldyń qańtar-sáýirimen salystyrǵanda 9,5 paıyzdy qurady. Dál osy kezeńde azyq-túlik emes taýarlar qunynyń ósimi 8,7 paıyz bolsa, aqyly qyzmetter 4,8 paıyzǵa qymbattap otyr.
2017 jyly Astanada negizgi taýarlar men qyzmetterdiń baǵasy 2016 jyldyń qańtar-aqpanymen salystyrǵanda 9,2 paıyz ósim kórsetti. Onyń ishinde azyq-túlik ónimderi men shyryndar baǵasy 13,2 paıyzǵa, azyq-túlik emes taýarlar 11,7 paıyzǵa, aqyly qyzmetter 2,2 paıyzǵa qymbattady. Osydan bir jyl buryn da elordada tutyný taýarlary men qyzmetterdiń baǵasy aıtarlyqtaı ósim kórsetken bolatyn.
Azyq-túlik ónimderi men shyryndar basqa óńirlerge qaraǵanda Astanada tez qymbattap (osydan bir jylǵy deńgeımen salystyrǵanda +13,2 paıyz) jatyr. Al eń tómen kórsetkish (+7,8 paıyz) Mańǵystaý oblysynda tirkelgen.
Azyq-túlik emes taýarlardyń baǵasy da Astanada jyldam qymbattap otyr, al aqyly qyzmetterdiń eń úlken ósimi aǵymdaǵy jyly Ońtústik Qazaqstan men Soltústik Qazaqstan oblystarynda 7,6 paıyzdyq deńgeıde tirkelgen. Astanada bolsa aqyly qyzmetter jyl basynan beri 2,2 paıyzǵa qymbattaı túsken.
