Astanada «Ómir aǵashy» monýmenti boı kóteredi
Álemdik jáne dástúrli dinder sezi aıasynda Qazaqstandaǵy túrli konfessııalar men ulttar arasyndaǵy yntymaqtastyqty, dostyq pen birlikti beıneleıtin tabıǵı-rekreatsııalyq saıabaq tujyrymdamasy daıyndalǵan. Elorda ákimdiginiń qoldaýymen júzege asyrylǵan joba Beıbitshilik jáne kelisim saıabaǵy dep atalyp, Esil ózeniniń boıynan ashyldy. Búgin sezd delegattarynyń qatysýymen saıabaqta 60-tan astam aǵash otyrǵyzyldy.
Qala ákimdiginiń Ýrbanıstıka ortalyǵynyń málimetinshe, jobanyń negizgi ıdeıasy - «Ómir aǵashy» monýmenti. Búginde kúmbez túrindegi eskertkishtiń qańqasy daıyn, onyń ortasyna japyraqty aǵash, emen otyrǵyzylǵan. Aǵash spıralmen jáne úılesimdi sýburqaqpen qorshalady.
«Avtor ıdeıasyna sáıkes, ǵasyrlar boıy tamyry tereńde jatqan sý men ómir aǵashy jer betindegi tirshiliktiń naqty beınesin aıshyqtaıdy. Osylaısha, ınstallıatsııa barlyq konfessııalardyń kelisimge, beıbitshilik pen dostyqqa shaqyrýyn bildiredi. Kúmbez óz kezeginde bir aspan astyndaǵy álemdi beıneleıdi. Onda 4 negizgi núkteni – Ońtústik, Soltústik, Batys, Shyǵysty bildiretin 4 kirý aımaǵy bolady», - delingen Ýrbanıstıka ortalyǵynyń málimetinde.
Kúmbez qabyrǵalarynda Dúnıeniń jaratylýyn, Qazaqstan tarıhyndaǵy oqıǵalardy kórsetetin beıneler, sondaı-aq qazirgi zamanǵa úndeý retinde elimizdiń aýmaǵynda tabylǵan áıgili ejelgi jartas sýretteri – petroglıfter salynady. Aǵashtyń aınalasyndaǵy spıral aspandy (kúmbezdi) jáne jerdi (sý betin) baılanystyrady, osylaısha álemniń náziktigi týraly ıdeıany jetkizedi.
Álemdik jáne dástúrli dinder lıderleriniń VII sezi delegatsııalary basshylarynyń sanyna sáıkes «Ómir aǵashy» monýmentiniń aınalasyna 60-tan astam japyraqty jáne qylqan japyraqty aǵash otyrǵyzyldy. Aǵashtardyń janyna saıabaq irgetasynyń qoıylǵan kúni jazylǵan eskertkish taqtalar ilinedi.
Saıabaqtyń qurylysyn aıaqtap, paıdalanýǵa berý 2023 jylǵa josparlanǵan.
Foto: gov.kz
