Astanada ólketaný jobasy aýqymynda jazǵy kanıkýl kezinde QR-nyń túpkir-túpkirinen 1200-den astam mektep oqýshysy bolady
ASTANA. 27 shilde. QazAqparat - Qazaqstan Respýblıkasynyń bilim jáne ǵylym mınıstri Baqytjan Jumaǵulov Almaty oblysynyń mektep oqýshylarymen - QR Bilim jáne ǵylym mınıstrligi ótkizip otyrǵan «Otanymyzdyń elordasy - Astanany oqyp-úırenemiz» ólketaný jobasyna qatysýshylarmen kezdesti., dep habarlady vedomstvonyń baspasóz qyzmeti.
«Elimiz táýelsizdiginiń arqasynda sender qazir ana tilinde bilim alyp jatyrsyzdar, Otanymyzǵa, onyń elordasy - Astanaǵa arnap óleńder jazyp júrsińder. Prezıdentimizdiń jáne memlekettiń egemendiginiń arqasynda biz Eýrazııa kindiginde ádemi qala turǵyzdyq. Senderge qalanyń kórikti jerlerin kórýge, elordanyń joǵary ulttyq rýhyn sezinýge múmkindik jasaldy, bolashaqta osy tamasha qalaǵa kelýge qulshynyp, elimizdiń damýyna óz úlesterińdi qosýǵa tyrysatyn bolasyńdar. Bolashaqta báriń de Nazarbaev ýnıversıtetiniń stýdentteri atanǵandaryńdy kórgim keledi», - dedi B.Jumaǵulov.
Mınıstr oqýshylardy óz muǵalimderin umytpaýǵa, olardyń uly eńbegin qurmetteýge úndedi.
Mektep oqýshylary elordadaǵy ózderiniń áserlerimen bólisti. Almaty oblysyndaǵy Jansúgirov atyndaǵy kentten kelgen Q.I.Sátbaev atyndaǵy mekteptiń 5-synyp oqýshysy Hamzat Djappýev «Men Astanaǵa kelgenimine baqyttymyn, biz birneshe kún ishinde qalanyń barlyq kórnekti oryndarynda, Aqordada, Qazaq eli monýmentinde, «Báıterekte» boldyq - áserlerimizdi sózben aıtyp jetkizý múmkin emes. Biz osyndaı arman-qalany salǵyzǵan Elbasyna alǵys aıtamyz», - dedi.
Ǵ.Ormanov atyndaǵy orta mekteptiń 7-synyp oqýshysy Gúldana Mútálip «Astana - álemdegi eń kórikti qala ǵoı dep oılaımyn, Astana - elimizdiń elordasy ekenin maqtanysh etemin», - degen pikirin bildirdi.
Elordada bolǵan kezde oqýshylar QR tuńǵysh Prezıdentiniń murajaıynda, «Astana-Báıterek» monýmentinde, Táýelsizdik saraıynda, Beıbitshilik jáne kelisim saraıynda, Prezıdenttik mádenıet ortalyǵy janyndaǵy murajaıda, «Atameken» etno-memorıaldyq kesheninde, Oqýshylar saraıynda boldy. Balǵyn qonaqtar úshin Esil ózenimen katerde saıahattaý uıymdastyryldy.
Jazǵy kanıkýl kezinde ólketaný jobasy aýqymynda eldordada respýblıkamyzdyń túpkir-túpkirinen 1200-den astam bala qonaqta bolmaq.
