Astanada olımpıadashylar alańy ashylady
ASTANA. QazAqparat - Astana ortalyq saıabaǵy qonaqtaryn jańa keıipte qarsy alady. Búginde saıabaqta jumys qarqyndy júrýde, dep habarlady qala ákiminiń baspasóz qyzmeti kommýnaldyq sharýashylyq basqarmasynyń basshysy Pavel Kýlagınge silteme jasap.
Saıabaq 6 aýmaqqa bólindi: saıajaı, ortalyq alleıa, mozaıkasy bar 4 grot kompozıtsııasy, qurǵaq sýburqaq, olımpıadashylar alańy.
«Ortalyq alleıa - ortalyq kireberis Turan dańǵylyn jaǵynda ornalasqan. Búginde qalalyq saǵattyń metall konstrýktsııasy ornatylǵan. Mamyr aıynda saǵatty jasaıtyn zaýyt ókilderi elordaǵa keledi. Sol kezde montajdaý jumystary jasalyp, qalalyq saǵatty aq mármármen qaptaý jumystary aıaqtalady», - dedi P. Kýlagın. Kireberiste qalalyq saǵat pen 4 grot kompozıtsııasyn kórýge bolady. Grotta jyldyń tórt mezgili kórinis tabady. Astanalyq sýretshiler bul grottardyń ishinde beınelenetin mozaıkalardyń eskızdik jobalaryn maquldady. Ortalyq alleıada saǵattyń janynda «qurǵaq» sýburqaq bolady. Sýburqaqtyń ereksheligi - onyń sý arnasy, aqqan sýy bolmaıdy, geızerler plıtalardyń astynan shyǵarylady. Jańashyldyqtyń basym bóligi osy ortalyq alleıamen baılanysty bolady, qalǵany retke keltiriledi, kespe tastar aýystyrylady jáne t.b. jumystar júrgiziledi.
«Sonymen birge, baqta ýaqyt arnasy nemese ýaqyt ózeni paıda bolady. Arna jermen birdeı deńgeıde ornalasady. Onda kúnniń kózi túrindegi ydystan sý aǵady. Sondaı-aq, olımpıadashylar alańynda fýndament salý, bólý jáne qurylys jumystary júrgizilýde. Olar olımpıadalyq saqınalar túrinde bolyp, munda elimizdegi barlyq olımpıada chempıondary men júldegerleriniń tizimi beriledi. Osylaısha, biz sporttyń alýan túrlerinen basty synda bıik belesten kóringen sporshylarymyzdyń aty-jóni jazylǵan qurmet taqtasyn jasamaqpyz. Qazirgi ýaqytta ony durys ornatý máselesi qaralyp jatyr», - dep qosty P. Kýlagın.
