Astanada Olımpıadaǵa baratyn úshinshi mánerlep syrǵanaýshy anyqtalyp jatyr
Atalǵan birinshilik jeltoqsannyń 29-na deıin jalǵasady. Bul birinshilikte Ońtústik Koreıada ótetin XXIII qysqy Olımpıada oıyndaryna qatysatyn úshinshi mánerlep syrǵanaýshynyń esimi belgili bolady.
Jarysqa elimizdiń ár óńirinen 80-nen astam sportshy baq synap jatyr. Olardyń arasynda eń kishkentaıy on bir jasta bolsa, eresegi - jıyrma bes jasta. Birinshilik jas erekshelikterine qaraı birneshe topqa bólingen.
Mánerlep syrǵanaý quramasynyń bas jattyqtyrýshysy Quralaı Ýzýrovanyń tilshilerge bergen málimetine súıensek, osy jarysta Olımpıada oıyndaryna áıelder quramasy sapynda baratyn úshinshi mánerlep syrǵanaýshy anyqtalmaq. Al ózge jeńimpazdarǵa álem birinshiligine joldama beriledi.
Esterińizge sala keteıik, osyǵan deıin Ońtústik Koreıanyń Phenchhan qalasynda ótetin XXIII qysqy Olımpıada oıyndaryna mánerlep syrǵanaýdan tuńǵysh ret Qazaqstannan úsh sportshy qatysatynyn aıtqan bolatynbyz. Osyǵan deıin, Denıs Ten men Elızabet Tursynbaeva joldama jeńip alǵan bolatyn. Sondaı-aq, Elızabet Tursynbaevanyń álem chempıonatyndaǵy kórsetkishiniń nátıjesinde Qazaqstan taǵy bir lıtsenzııaǵa qol jetkizý múmkindigine ıe bolǵan edi. Endi sol úshinshi joldama osy el birinshiliginde anyqtalmaq. Oǵan Aıza Imambek pen Jansaıa Ádihanova basty úmitker retinde qaralyp otyr.
