Astanada Olımpıada oıyndaryndaǵy jarysty tikeleı efırden tamashalaýǵa bolady
ASTANA. KAZINFORM – 14 aqpanda Astana qalasynda Esil ózeniniń jaǵalaýynda Italııada ótip jatqan 2026 jylǵy qysqy Olımpıada oıyndary aıasyndaǵy jarystardy ujym bolyp tamashalaýǵa bolady. Atalǵan is-sharany Qazaqstan Ulttyq Olımpıadalyq komıteti men Astana qalasynyń Dene shynyqtyrý jáne sport basqarmasy uıymdastyrady.
Bul is-shara «Burqasyn-2026» qysqy qalalyq festıvali aıasynda ótedi.
Áıelder arasyndaǵy paralleldi mogýl saıysy kórermen nazaryna usynylady. Atalǵan jarysqa Qazaqstan sportshylary da qatysady. Olımpıadany tamashalaý festıvaldiń mazmundy baǵdarlamasynyń bir bóligi bolyp, elorda turǵyndary men qonaqtary úshin sporttyq básekelerdi, mádenı is-sharalar men ınteraktıvti alańdardy biriktirmek.
«Burqasyn-2026» festıvaliniń saltanatty ashylýy saǵat 10:00-de ótedi. Kún boıy 13 sport túri boıynsha jarystar uıymdastyrylady. Atap aıtqanda, 16 jas jáne áleýmettik sanattaǵy shańǵy jarystary, gır sporty, armrestlıng, pıma kıgen kúıdegi hokkeı, belbeý kúresi, motokross, avtosport, arqan tartý, qysqy mını-fýtbol, qarmen laqtyrý, qysqy voleıbol, mas-restlıng jáne úrlemeli shanamen jarystar ótedi.
Negizgi sporttyq baǵdarlamadan keıin bas sahnada arnaıy olımpıadalyq blok bastalady. Saǵat 14:00-de 2026 jylǵy qysqy Olımpıada oıyndary aıasynda áıelder arasyndaǵy paralleldi mogýl saıysyn tikeleı efırde tamashalaýǵa bolady.
Translıatsııa aldynda kórermen úshin sergitý jattyǵýlary men júrgizýshimen ınteraktıv uıymdastyrylady. Sondaı-aq olımpıadalyq taqyryptaǵy suraqtarǵa jaýap berýge arnalǵan «Olımpıadalyq blıts» baıqaýy ótip, jeńimpazdarǵa syılyq tabystalady.
Jarys kezeńderi arasyndaǵy úzilisterde Qazaqstan Ulttyq Olımpıadalyq komıtetiniń seriktesi Invictus GO brendinen jáne QR UOK-tiń estelik syılyqtary oınatylady.
Olımpıadalyq jarystardyń tikeleı kórsetilimi saǵat 14:00-de bastalady.
Aıta keteıik, 13 aqpan kúni Italııanyń Mılan jáne Kortına-d’Ampetstso qalalarynda XXV qysqy Olımpıada oıyndarynyń altynshy jarys kúni bastaldy.