Astanada Olımpıada chempıondarynyń qatysýymen «BI Marafon» qaıyrymdylyq marafony ótedi

ASTANA. QazAqparat - BI Group kompanııasy salaýatty ómir saltyn nasıxattaý maqsatynda 2016 jyly 28 mamyrda Astana qalasynda qaıyrymdylyq marafonyn uıymdastyrady. Bul týraly búgin Ortalyq kommýnıkatsııalar qyzmetinde ótken baspasóz máslıxatynda BI Group kompanııasy dıvızıon dırektory Maksım Chernyshov málim etti.

Biryńǵaı qashyqtyqtaǵy jartylaı marafonda 5, 10, 21 shaqyrym jáne 42 shaqyrym 195 metr klassıkalyq marafonǵa nıet bildirgen kez kelgen adam qatysa alady. Qatysý úshin ótinishter bi-marathon.kz saıtynda qabyldanady.
"Qatysýshylar men komandalardyń tirkeýinen túsken barlyq qarajattar sal aýrýyna shaldyqqan balalardy medıtsınalyq ońaltýǵa arnalǵan jabdyqtardy satyp alý úshin "BI Juldyzaı" qaıyrymdylyq qoryna aýdarylady", - deıdi M. Chernyshov.
Bul marafonǵa tanymal qazaqstandyq sportshylar men olımpıada chempıondary qatysady dep kútilýde. "Men buqaralyq sport sharalaryna qatysýǵa qýana kelisim beremin. Sebebi osyndaı sporttyq sharalar xalyqty, qazaqstandyqtardy sportqa jaqyn etedi, salaýatty ómir saltyn qalyptastyrýǵa septigin tıgizedi. Men 28 maýsymdaǵy marafonǵa qatysýdy josparlap otyrmyn", - deıdi London Olımpıadasynyń chempıony, eki dúrkin álem chempıony, "Astana Arlans" boks klýbynyń bas dırektory Serik Sápıev.