Astanada oqýshylar arasynda «Robototehnıka» saıysy bastaldy

Sharanyń saltanatty ashylýyna QR Bilim jáne ǵylym mınıstrligi mektepke deıingi jáne orta bilim departamentiniń dırektory Jańyl Jontaeva, «KATEV» Halyqaralyq qoǵamdyq qorynyń vıtse-prezıdenti Sel Abdýrahman, Astana qalasynyń maslıhat depýtaty Gaıdar Kasenov, Respýblıkalyq Daryn ǵylymı-praktıkalyq ortalyǵynyń dırektory Sholpan Qırabaeva, «NurOrda» mektep-lıtseıiniń dırektory Oztomsýk Orhan jáne taǵy da basqa qonaqtar qatysty.   

«Jas jasampazdar joba jarysy» bul - Qazaqstan Prezıdenti Nursultan Nazarbaevtyń «Qazaqstan joly - 2050: Bir maqsat, bir múdde, bir bolashaq» Joldaýy aıasynda osymen 3 ret uıymdastyrylyp jatyr. Sondaı-aq, «EXPO-2017» balamaly energııa kózderi, áleýmettik-qoǵamdyq máseleler, jaratylys taný jáne gýmanıtarlyq baǵyt boıynsha ótkiziledi.

Al, Robotıks saıysy bıyl alǵash ret oqýshylardyń ekologııalyq, shyǵarmashylyq, logıkalyq, qasıetterin nyǵaıtý, haı-tek jáne nanotehnologııalardy damytý úshin uıymdastyrylyp otyr. Oǵan elimizdiń barlyq óńirindegi qazaq-túrik lıtseılerinen 200-den asa oqýshy qatysýda. Shara barysynda oqýshylar robot jasaıtyn jańa úlgidegi «LEGO-ROBOT» sekildi baǵdarlamalardy paıdalanady.

Qazylar quramyna robototehnıka salasynda qyzmet etetin Qazaqstan jáne shetel mamandary men ǵalymdary kiredi. Oqýshylar arasynan jaqsy nátıje kórsetken jobalar «Startap» retinde qarastyrylyp, kásipkerlikte qoldanylatyn bolady. Mundaı júldelendirý úrdisi balalardyń kúrdeli ǵylymı suraqtardyń jaýabyn izdeýge, aýtentıkalyq zertteý jumystaryn qoldanýǵa, erteńgi kúnniń ózekti máselelerine sheshim tabýǵa ıtermeleıdi.

Sondaı-aq, saıys nátıjesinde joǵary oryn ıelengen balalar Koreıada jáne Brazılııada ótetin jarysqa joldama alady.