Astanada oqýshy toqqa túsip, qolynan aıyryldy
ASTANA. QazAqparat - Jasóspirim týra mekteptiń janyndaǵy qaraýsyz qalǵan zaýyttyń aýlasynda abaısyzda elektr symyn ustap alǵan. Oıyn balasynyń qatty kúıip qalǵany sonsha, dárigerlerge onyń qolyn kesip tastaýǵa týra keldi. Eńiregen ata-ana endi, uldaryn múgedek qylǵandarmen sottaspaqshy, dep habarlaıdy KTK .
Jaǵa ustatar jaıt qaladaǵy 57-shi mekteptiń aldyndaǵy eski zaýytta bolǵan. Kezinde temir qaqpa, qorshaýlar men ózge de zattardy shyǵarǵan kásiporyn qazir qaraýsyz jatyr. Biraq, ashyq-shashyq jatqanymen, ǵımaratta áli toq bar. Tipti, transformator ornalasqan. 10 jastaǵy Danıl sabaqtan keıin osy kabelderdiń birin abaısyzda ustap, toqqa túsken.
Bir táýlik jansaqtaý bóliminde jatqan Danıl endi esin jıdy. Biraq, toqtyń qatty soqqysynan aman qalǵanymen, sol qolyn bilek tusynan kesip tastaýǵa týra kelgen.
«Qan júrmegen soń, alaqan jaǵy ólgen soń kesip tastaýǵa týra keldi. Búgingi tańda jaǵdaıy jaman emes. Oń aıaǵyndaǵy jaralary jazylyp qaldy. Aýyrýyna baılanysty kerek emniń bárin alyp jatyr»,- dedi № 2 qalalyq balalar aýrýhanasynyń bas dárigeri mindetin atqarýshy Ulybek Asylbekov.
«5-shi synyp oqýshy Danıl toqqa túsken jer jekemenshik seriktestikke qaraıdy. Endi anasy elektr symdaryn qalaı bolsa solaı qaldyryp, aınalasyn qorshamaǵan fırmamen sottaspaqshy. Onyń ústine munda jıi kelip oınaýdy ádetke aınaldyrǵan ózge oqýshylarǵa da qaýip tónip tur. Óıtkeni, ǵımaratqa bir emes, eki birdeı mektep tym jaqyn ornalasqan. Qazir polıtsııa toqqa túsý deregi qylmystyq is qozǵap, tergeýdi bastap ketti», - dep jazady arna.
