Astanada oqýshy qyz óz-ózine qol salmaq bolyp, kópirden sekirdi
ASTANA. 10 maýsym. QazAqparat -Astana patrýldik polıtsııa polki kavalerııalyq rotasynyń tártip saqshylary kezekshilikti atqarý barysynda Saraıshyq kóshesindegi kópirden qyz balanyń sýǵa sekirgenin kórgen.
Bul týraly elordalyq ІІD-niń baspasóz qyzmetinen habarlady.
Polıtsııa aǵa serjanty Aıbek Ǵapparov onyń sońynan sýǵa sekirdi. Qyzdy jaǵaǵa alyp shyqqan soń tártip saqshysy óziniń áriptesi, polıtsııa aǵa serjanty Berkimbek Seıdýálıevpen birge jedel járdem jetkenshe oǵan alǵashqy medıtsınalyq kómek kórsetti.
Polıtsııa serjanttarynyń jedeldiginiń jáne ýaqytyly qabyldaǵan sharalarynyń arqasynda qaıǵyly oqıǵaǵa jol berilmedi.
Qyz sýǵa sekirer aldynda týǵandaryna sms-habarlama joldap, onda ata-anasynan keshirim suraǵan. Al aıaq kıimi men uıaly telefonyn jaıaý júrginshiler jolyna qaldyrǵan. Onyń óz-ózine qol salý áreketiniń sebepteri anyqtalý ústinde.
Qutqarylǵan qyz «bel jáne moıyn omyrtqalarynyń jaraqaty» dıagnozymen aýrýhanaǵa jetkizildi. Medıtsınalyq kómekten keıin ol úıine qaıtaryldy.
Búgingi tańda mektep oqýshysy ata-anasynyń qaraýynda, onymen Astana qalalyq ІІD kámeletke tolmaǵandar isteri jónindegi bólimniń psıhologtary men qyzmetkerleri jumys isteýde.
