Astanada oqýshylarǵa sýdy únemdeý boıynsha ınteraktıvti sheberlik sabaqtary ótkizilip jatyr
ASTANA. KAZINFORM — Astana qalasynda Sý resýrstary jáne ırrıgatsııa mınıstrliginiń bastamasymen Aqua Lab bilim berý baǵdarlamasy aıasynda oqýshylarǵa arnalǵan ınteraktıvti sheberlik sabaqtary ótip jatyr.
Baǵdarlamany «Sý resýrstarynyń aqparattyq-taldaý ortalyǵy» KEAQ pen Caravan of Knowledge korporatıvtik qory júzege asyryp jatyr.
Sheberlik sabaqtarynyń basym bóligi praktıkalyq jumystarǵa arnalǵan. Baǵdarlama eki baǵytty qamtıdy. Onyń birinshisi - «Sý detektıvi», ekinshisi - «Joryq jaǵdaıynda sý súzgisin jasaý». Bul sabaqtarda oqýshylar sýdy súzý prıntsıpterimen tanysyp, arnaıy súzgi qurastyrady jáne onyń jumysyn synaqtan ótkizedi.
Sonymen qatar mektep oqýshylary Aqua Lab zerthanalyq jabdyqtaryn paıdalanyp, sýmen qarapaıym tájirıbeler júrgizedi. Olar ólsheý nátıjelerin jazyp, ózara salystyrady. Al qyzyǵýshylyq tanytqan oqýshylar Aqua Lab úıirmesindegi sabaqtaryn jalǵastyra alady.
Sheberlik sabaqtary «Tanym» kópfýnktsıonaldy ortalyǵynda ótip jatyr. Baǵdarlamaǵa Coca-Cola kompanııasy men Astana qalasynyń Tárbıe jumysy jáne qosymsha bilim berý ádistemelik ortalyǵy da seriktes retinde qoldaý kórsetip otyr.
- Biz ár balanyń alǵan bilimin úıde de, mektepte de qoldana alýyna múmkindik berý úshin praktıkalyq oqytýǵa basymdyq beremiz. Balalar boıynda sýdy únemdeý daǵdylaryn neǵurlym erte qalyptastyrsaq, bolashaq urpaqtyń elimizdiń sý resýrstaryna degen jaýapkershiligi de soǵurlym joǵary bolady, - dedi «Sý resýrstarynyń aqparattyq-taldaý ortalyǵy» KEAQ basqarma tóraǵasy Qaıratǵalı Haırýlla.
Aıta keteıik, Soltústik Araldy saqtaýǵa baǵyttalǵan 131 joba maquldandy.