Astanada oqýshylardy kitap oqýǵa baýlıtyn jańa joba qolǵa alyndy
Astanada jańa toqsan bastalǵaly jalpy bilim beretin mektepterde «8 mınýttyq oqý» dep atalatyn jańa joba qolǵa alyndy. Balalar birinshi sabaqtyń aldynda kúndelikti 8 mınýt ýaqytyn kitap oqýǵa arnaıdy. 2 mınýt úzilisten soń sabaqtaryna kirisedi. Joba erejesine sáıkes, kitap qaǵaz formatta bolýy kerek.
Ádette, sabaq bastalar kezde nemese úziliste soǵylatyn qońyraýdan bólek, kitap oqýdy bastaý keregin bildiretin jeke qońyraý soǵylady. Áýen úni estilisimen balalar kitaptaryn shyǵaryp, oqýǵa qamdanady.
"Osy joba «Birtutas tárbıe» baǵdarlamasyna dóp keledi. 8 mınýttyq oqý jobasynyń maqsaty oqýshylardy kórkem shyǵarma oqýǵa yntalandyrý, qalyptastyrý jáne de tanym kókjıegin keńeıtý", - deıdi qazaq tili men ádebıeti pániniń muǵalimi Aınur Nurjanova.
Jańa jobanyń oqýshylar arasynda kitap oqýdy nasıhattaýda mańyzy zor. Tyń bastama «Oqýǵa qushtar mektep» jobasy aıasynda qolǵa alynǵan.
Oqý jylynyń sońyna deıin ár oqýshy kemi 10 kitapty oqyp shyǵady. Sosyn ár kitapty oqyp bitergen soń ony synyp bolyp talqylaıdy. 8 mınýttyq oqý jobasy aıasynda oqýshylarǵa usynylatyn kitaptardyń mazmundyq qurylymy ulttyq sanany qalyptastyrýǵa, adamgershilik qasıetterdi dáripteýge, sonymen qatar, salaýatty ómir saltyn nasıhattaýǵa baǵyttalǵan. ıAǵnı, osy arqyly oqýshylardyń kitap oqýǵa degen qyzyǵýshylyǵy artady. Qoǵamǵa degen kózqarasy ózgeredi jáne sóıleý mádenıeti qalyptasady.
Joba aıasynda mazmuny jaǵynan aldyn ala iriktelgen ádebıetter tiziminen kez kelgen kitapty oqýǵa bolady. Týyndy kádimgi kitap bolýy shart. Jobany ata-analar qaýymy da qýana qoldaǵan.
Máselen, Jumagúl Ábsemetova: "Men muny durys joba dep esepteımin. Óte oryndy. Balalaryma aıtyp otyrýǵa tyrysamyn jáne nemerelerime de kitap oqýdy dáriptep otyramyn", - dedi.
Halyqaralyq «Qazaq tili» qoǵamy» QB prezıdenti Raýan Kenjehanuly: "Ókinishtisi, dál qazir bizde sol oqý jaǵy jáne oqyǵandy túsinip, sony aýyzsha, jazbasha jetkizý jaǵy aıtarlyqtaı tómen. Ony dáleldep otyrǵan bizdiń ǵana zertteýler men pikirler emes. Oqý saýattylyǵyna qaraıtyn bolsaq, bizde Qazaqstandaǵy oqýshylardyń 64 paıyzy ortashadan tómen nátıje kórsetip jatyr. Sondyqtan bizge qoǵam bolyp, el bolyp osy oqý saýattylyǵyna kúsh salý kerek dep esepteıdi", - dedi.
Jańa jobanyń berer tálim men tárbıesi óte zor. Ony ustazdar men ata-analar aıtyp otyr.
Zulqarnaı Ermuratuly
