Astanada «Oqýshylar saraıynda» esirtki jarnamalaǵan QR kod anyqtaldy
ASTANA. KAZINFORM – Buǵan deıin oqýshylar saraıy esiginiń ishki jaqtaýyna esirtki taratylatyn mekenjaı kórsetilgen QR kod ilingeni týraly aıtylǵan edi.
«Májilis depýtaty Juldyz Súleımenovamen bir jumys tobyndamyz. Oqýshylar saraıyna óz basym baryp tekserip kórdim, rasynda da QR kod esirtkini taratýǵa qatysty bolyp shyqty, biz ony tez arada alyp tastadyq. Bizdegi málimet boıynsha, qazir quqyq qorǵaý organdary máseleniń mán-jaıyn saralap jatyr», - dedi «ESBOL» qorynyń tóraǵasy Jandos Aqtaev Kazinform agentigi tilshisiniń suraǵyna jaýap bere turyp.
Eske sala keteıik, Májilistiń jalpy otyrysynda depýtat Juldyz Súleımenova esirtkiniń QR kod arqyly taralyp jatqanyn aıtqan edi.
«Qazir QR kod arqyly sıntetıkalyq esirtkilerdiń taralýy kóp taralyp jatyr. Mysaly, oblys ortalyǵynda kóshe ataýy jazylǵan taqtaıshadaǵy QR kodty basqan kezde, esirtki taralatyn mekenjaılar baıqalǵan, taǵy bir oqıǵa keshe ǵana áleýmettik jelide aıtylyp jatyr, Astana qalasyndaǵy Oqýshylar saraıy esiginiń ishki jaqtaýyna QR kod ilingen, ony ashyp qarasa esirtki taratylatyn mekenjaı kórsetilgen. Osy oraıda aqparattyq qaýipsizdik maqsatynda qandaı is-sharalar qoldanasyzdar?» - dep Juldyz Súleımenova ІІM ókiline saýal qoıdy.
Aıta keteıik, búgin Astanada esirtki qylmysynyń digital-kartasy iske qosyldy.
