Astanada oqýshy qyzdarǵa qyryndaǵan muǵalimniń ústinen qylmystyq is qozǵaldy
ASTANA. KAZINFORM – Áleýmettik jelide astanalyq ustazdyń oqýshy qyzdarǵa qyryndap, mazasyn alyp júrgeni týraly vıdeo tarap, daý shyqty. Іstiń mán-jaıyn qalalyq bilim basqarmasynan suraǵan edik.
«Muǵalim 2024 jylǵy 2 qyrkúıekten beri synaq merziminde jumys istedi. Mektepishilik tártip komıssııasynyń sheshimimen pedagog 2024 jylǵy 30 qyrkúıekte jumystan bosatyldy», - degen aqparat aldyq basqarmanyń baspasóz qyzmetinen.
Belgili bolǵandaı ustazdy QR Eńbek kodeksiniń 52 baby, 14 tarmaǵy negizinde (tárbıeleý fýnktsııalaryn atqaratyn jumysker osy jumysyn jalǵastyrýmen syıyspaıtyn, moralǵa qaıshy qylyqtar jasaǵan) jumystan bosatqan.
Ata-analar shý shyǵarǵannan keıin jumystan qýylǵan muǵalimniń ústinen qylmystyq is qozǵaldy.
«Atalǵan fakti boıynsha qylmystyq is tirkeldi, tergeý amaldary júrip jatyr. Qylmystyq-protsestik kodekstiń 201-babyna sáıkes ózge de aqparat taratýǵa jatpaıdy», - dep rastady elordanyń polıtsııa departamenti.
Sondaı-aq, elimizdiń bala quqyqtary jónindegi ýákili Dınara Zákıeva atalǵan jaıt boıynsha qylmystyq is qozǵalǵanyn jelide jazdy.
