Astanada oqý jyly qarsańynda jańa avtobýstar júre bastaıdy
ASTANA. QazAqparat – Bıyl elordada 400 avtobýs tapshylyǵy bar. Bul týraly Astana qalasy Kólik jáne jol-kólik ınfraqurylymyn damytý basqarmasy basshysy orynbasarynyń mindetin atqarýshy Baýyrjan Taıbergenov aıtty, dep habarlaıdy QazAqparat tilshisi.
«2019 jyly biz 100 elektrobýs satyp aldyq, al keıingi tórt jylda bizde jańartý bolmady. Bıyl 400 avtobýs tapshylyǵy bar. Máslıhat depýtattarynyń qoldaýymen 300 avtobýs satyp alýǵa 6,2 mlrd teńge bólindi, osy 300 avtobýstyń 70-i Astanaǵa jetkizildi. Qazir bul kólikterge tıisti qurylǵylar men jabdyqtardy qosý iske asyrylyp jatyr. Jańa oqý jyly bastalatyn kezde, bul avtobýstar jolaýshy tasymaldaýǵa shyǵady», - dedi B.Taıbergenov Astana qalasy máslıhaty turaqty komıssııasynyń otyrysynda.
Onyń aıtýynsha, qalǵan avtobýstar elordaǵa kúz aılarynda jetkizilmek.
«Sonymen qatar sýbsıdııalardyń arqasynda jeke avtoparkter jańa avtobýstardy satyp ala bastaǵanyn atap ótkim keledi. Úshinshi avtopark 25 avtobýs satyp alyp, jolaýshy tasymalyna shyǵardy. Altynshy park te 25 avtobýsty jetkizdi. Sondaı-aq jyl sońyna deıin jetinshi park 20 avtobýsty, tórtinshi park 10 kólikti alady. Olar – 12 metrlik avtobýstar. Atap aıtqanda, jańa 400 avtobýs tolyq jetkizilgen kezde, jańa 6 baǵdardy iske qosamyz. Osy oraıda Agroqalashyq, Kóktal-1 jáne Kóktal-2, Úrker, Shyńǵys Aıtmatov, Muhamedhanov, Syǵanaq, Tóle bı, Turan jáne qalanyń basqa da aýdandaryndaǵy máseleni sheshemiz», - dedi ol.
Budan buryn habarlanǵandaı, Astana turǵyndarynyń 48 paıyzǵa jýyǵy qoǵamdyq kólikpen júredi.
