Astanada OQO kúnderi aıasynda 40 tonna qaýyn-qarbyz ben palaý taratylady
ShYMKENT. QazAqparat - Ońtústik Qazaqstan oblysy jurtshylyǵy elordalyqtarǵa jeti erekshe tartý jasamaqshy. Bul týraly oblys ákiminiń orynbasary Ulasbek Sádibekov Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat HAA tilshisi.
«EKSPO-2017» halyqaralyq mamandandyrylǵan kórmesi aıasynda Astana qalasynda ótetin Ońtústik Qazaqstan oblysynyń kúnderi aıasynda birneshe tosynsyılar jasalmaq. Máselen, «Qurban aıt» merekesiniń birinshi kúninde etnoaýylda 5000 adamǵa arnalyp palaý pisirilip, «1 qaýyn, 1 qarbyz» ataýymen 40 tonna qaýyn-qarbyz áleýmettik jaǵynan az qamtylǵan otbasylarǵa tegin úlestiriledi. «Báıterek» monýmentiniń aldynda ońtústikqazaqstandyq ónertapqysh Bókebaev Erkinbek qurastyrǵan qazaq arbasymen elorda turǵyndary men qonaqtaryna aıttyq dám usynylady. Oblys jastary «Qurban aıt» merekesine oraı, qoǵamdyq kólikterde adam kóp shoǵyrlanatyn jerlerde 5 myń adamǵa baýyrsaq, tátti nan taratyp, merekemen quttyqtaıtyn bolady.
Ulttyq kitaphanada Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasy sheńberinde shyǵarylǵan «Tulǵa. Táýelsizdik. Tarıh», «Jahan tanyǵan jeti tulǵa» atty kitaptary men Astana qalasynyń oqýshylar saraıynda «Kúsh atasy - Qajymuqan» anımatsııalyq fılminiń tusaýkeseri ótkiziledi. Budan bólek, «Qazmunaıgaz» kompanııasynyń ǵımaratynan bastap, «Nurjol» gúlzary boıymen «Báıterek» alańyna deıin «Túrki eliniń túp tamyry - Ońtústikten mereıli Astanaǵa sálem!» atty ejelgi tarıhymyzdan syr shertetin buıymdar tıelgen túıelerdiń, attardyń kerýeni júrip ótedi.
Sonymen qatar, «Báıterek» alańynda bir ýaqytta 600 jas dombyrashynyń oryndaýyndaǵy kúı oryndalady. 1-2 qyrkúıek kúnderi eki qabatty aǵylshyn avtobýsymen elordanyń adam kóp shoǵyrlanatyn jerleri men «Máńgilik el», «Saryarqa» jáne t.b. basty kóshelerinde mýzykalyq sherý uıymdastyrylady.
Atalǵan negizgi 7 sharadan basqa da baǵdarlamaǵa sáıkes oblystyń salt-dástúrin, ádet-ǵurpyn, mádenıeti men baılyǵyn pash etetin jalpy sany 43 mádenı kópshilik is-sharasy ótedi dep kútilýde.
