Astanada Okadzaki meıramhanasynda 37 adam taǵamnan ýlandy
Elordada «Okadzaki» qoǵamdyq tamaqtaný nysandarynyń birinde jappaı taǵamnan ýlaný jaǵdaıy tirkeldi. Bul týraly Astana qalasynyń Sanıtarııalyq-epıdemıologııalyq baqylaý departamenti málim etti, dep habarlaıdy Kazinform.
Bastapqyda áleýmettik jelilerde «Okadzaki» meıramhanasynan tamaqtanyp, ýlandyq degen jazbalar jarııalana bastady. Zardap shegýshilerdiń biri Ámına Sultanǵazy agenttikke suhbat berdi.
«Alǵashqy eki kún qatty aýyrdym jáne jańajyldyq is-sharalarǵa qatysqandyqtan, vırýs juqtyrǵan shyǵarmyn dep oıladym. Dene qyzýy, álsizdik, 5 kún toqtamastan dıareıa boldy. Jedel járdem qyzmetin shaqyrǵanda, olar «ınfektsııalyq ýlaný» dıagnozyn qoıdy. Sonyń aldynda «Okadzaki» meıramhanasyna sýshı jeýge barǵanbyz. Menimen birge meıramhanaǵa barǵan taǵy eki qurbymda ýlaný belgileri baıqaldy. Bireýi juqpaly aýrýlar ortalyǵyna baryp qaraldy. Ondaǵy dárigerler de tamaqtan ýlanyp túsken patsıentter kóp ekenin aıtqan», - deıdi Ámına Sultanǵazy.
Bul másele jóninde Kazinform agenttigi Sanıtarııalyq-epıdemıologııalyq baqylaý departamentine saýal joldady.
«Okadzaki» meıramhanasyndaǵy ýlaný jaǵdaıy jeltoqsanda oryn aldy, ol boıynsha qazirgi ýaqytta epıdemııaǵa qarsy is-sharalar júrgizilýde. Búgingi kúni zardap shekkenderdiń sany 37 adamdy qurady. Ótinish berýshiniń shaǵymy negizinde jospardan tys tekserý júrgizilýde», - dep jazylǵan agenttik saýalyna jiberilgen jaýapta.
Eske sala ketsek, 2022 jyly da «Okadzaki» qoǵamdyq tamaqtandyrý nysandarynda 90-nan astam adam ýlanǵan edi. Atalǵan nysandarǵa qatysty polıtsııa basqarmasy qylmystyq is qozǵady jáne sot 1 110 900 teńge kóleminde aıyppul saldy. Bir obektiniń qyzmeti toqtatyldy.
Oǵan qosa, sanıtarııalyq-profılaktıkalyq jáne epıdemııaǵa qarsy is-sharalardy júrgizý týraly qaýlylar, buzýshylyqtardy joıý týraly nusqamalar, medıtsınalyq tekserýden ótpegen adamdardy, sondaı-aq bakterııa tasyǵyshy anyqtalǵan adamdardy shettetý týraly qaýlylar shyǵaryldy.
Departamenttiń aıtýynsha, shaǵyn jáne shaǵyn kásipkerlik sýbektilerin tekserýge moratorıı bolǵandyqtan «Okadzakı» qoǵamdyq tamaqtandyrý obektileri josparly tártippen tekserýge jatpaıdy.
Jospardan tys tekserýler tek 2022 jyly eki nysanǵa qatysty ýlaný boıynsha júrgizilgen. Bul tekserýde obektilerdiń jobalyq qýatynyń artýy, tehnologııalyq protsesterdiń aǵynyn saqtamaý, paıdalanylatyn tamaq jáne azyq-túlik ónimderine qujattardyń bolmaýy, sanıtarlyq-gıgıenalyq jaǵdaıdyń qanaǵattanarlyqsyz bolýy, óndiristik baqylaýdyń bolmaýy, zerthanalyq jumystardyń sáıkes emes nátıjeleri anyqtalǵan.
«Qazir «Okadzaki» meıramhanasynda jospardan tys tekserý júrgizilýde. Sondaı-aq, Esil aýdanynyń polıtsııa basqarmasy sotqa deıingi tergeýdi tirkedi. Qylmystyq is qylmystyq jazalanatyn is-áreket belgileriniń bolmaýyna baılanysty toqtatylǵan jaǵdaıda, departament 425-baptyń 2-bóligi boıynsha ákimshilik hattama jasaıdy jáne sheshim qabyldaý úshin sotqa joldaıdy», - deıdi departament.
