Astanada Nurjol jeleginde 900-den astam aqyly turaq orny jasalady
ASTANA. QazAqparat - Elorda ákimdigi kólik júıesiniń sapasyn jaqsartýǵa baǵytalǵan «Astana qalasynyń uraq keńistigin basqarý» jobasyn qolǵa aldy. Ozyq tehnologııalar aldymen Nurjol jeleginde paıdalanylady. Áńgime aýmaqty shlagbaýmmen jabý týraly emes. Bul - Qazaqstanda engizilip jatqan múldem jańa tehnologııa.
Synaq jumystary barysynda Nurjol jeleginde 910 turaq orny jasalady. Árbir turaq orny arnaıy jol belgisimen jáne tetiktermen jabdyqtalady. Aýmaqqa kirgen kezde júrgizýshiler elektrondy tablodan bos turaq oryndary týraly málimetti kóredi. Kóliktik baqylaý qyzmetiniń ókilderi kólik qoıý erejesin buzý jaǵdaılaryn avtomattandyrylǵan foto jáne beıne quraldardyń kómegimen tirkeıdi, dep habarlanǵan ákimdiktiń resmı saıtynda.
Júıe synaqtan ótkizilgennen keıin jáne halyqty «Turaq keńistigin basqarý» jobasynyń iske qosylǵandyǵy týraly resmı túrde habardar etilgen soń turaq keńistigin paıdalanǵany úshin aqy alynatyn bolady.
Joba boıynsha aqy tóleýdiń birneshe joly qarastyrylǵan, ol kezeń-kezeńmen engiziletin bolady. Atap aıtqanda, qolma-qol aqshamen jáne arnaıy parkomattar arqyly esep aıyrysý, arnaıy mobıldik qosymshanyń kómegimen SMS-pen jáne saıttaǵy jeke kabınet arqyly tóleý.
Keler jyly synaq jumystary oń nátıje bergen jaǵdaıda Astana qalasynyń ákimdigi basqarylatyn 9 000 jýyq turaq ornyn jasamaq. Basqarylatyn turaq oryndary 25 kósheni, elordanyń sol jaǵalaýynda Turan - Saraıshyq - Orynbor - Syǵanaq «kvadratyn», oń jaǵalaýda - Saryarqa - Bógenbaı batyr, Respýblıka - Esil jaǵalaýyn qamtıdy.
Aıta keteıik, 2015 jyly Price Waterhouse Coopers halyqaralyq uıymy Astananyń Nurjol jelegindegi kólik aınalymyn zerttedi. Monıtorıng nátıjesinde, júrgizýshilerdiń 80% óz kólikterin jumys oryndarynyń janynda orta eseppen 8-9 saǵatqa qaldyratyny anyqtaldy. Sondaı-aq, 13-14 saǵat boıy mashınalar turǵyn úı keshenderiniń aldynda turady jáne júrgizýshilerdiń 15-20%-y ǵana temir tulparlaryn jabyq parkıngterge qoıatyny belgili boldy. ıAǵnı, elordalyqtardyń kólikteriniń basym bóligi kúni boıy turaqta turady.
