Astanada Nursultan Nazarbaevtyń qatysýymen Jeńimpazdar forýmy bastaldy

Atap aıtqanda, forým barysynda sahnada qazaqstandyq estrada juldyzdarynyń qatysýymen kontsert ótip jatyr. Velotrekke jınalǵan 8 myń adam kezekten tys prezıdenttik saılaýda jeńiske jetken Nursultan Nazarbaevqa qoshemet kórsetýde. Olardyń arasynda belgili qoǵam jáne mádenıet qaıratkerleri, tanymal sportshylar, zııaly qaýym ókilderi bar.

Uıymdastyrýshylardyń aıtýynsha, búgingi shara «Jeńimpazdar forýmy» dep atalýyna keshegi saılaýda bir ǵana adam nemese onyń komandasy emes, sonymen qatar barsha qazaqstandyqtardyń jeńiske jetýi sebep boldy. «Keshegi ataýly kúnde barsha Qazaqstan halqy jarqyn bolashaq jolyn tańdady», - deıdi forýmǵa qatysýshylar.

Budan buryn habarlanǵandaı, búgin QR Ortalyq saılaý komıssııasynyń tóraǵasy Qýandyq Turǵanqulov aldyn ala málimetter boıynsha QR Prezıdenttik saılaýynda Nursultan Nazarbaev 97,7 paıyz daýys jınaǵanyn málim etti. «Oblystyq, Astana jáne Almaty qalalyq aýmaqtyq saılaý komıssııalarynan alynǵan derekter negizinde biz sizderdi QR Prezıdentiniń saılaýyna saılaýshylardyń kelýiniń qorytyndy nátıjelerimen tanystyrýǵa múmkindigimiz bar. Bul kórsetkish 95,22 paıyzdy qurady. 26 sáýir kúngi málimettermen salystyrǵanda, Astana qalasyna qarasty sheteldik ýchaskeler esebinen kóbeıdi», - dedi Q.Turǵanqulov.