Astanada «Nurly jol belesteri» kórmesine qazaqstandyq óner sheberleriniń týyndylary qoıyldy

ASTANA. QazAqparat - Astanada Táýelsizdik saraıynyń qazirgi zaman óner galereıasynda «Nurly jol belesteri» atty kórme ótip jatyr.

Ekspozıtsııaǵa Astana qalasy Sýretshiler odaǵynyń jumystary shyǵaryldy, dep habarlaıdy elorda ákimdiginiń baspasóz qyzmetinen. Kórmege túrli baǵyttaǵy 139 jumys - klassıkalyq portret, peızaj, sımvolızm stılindegi sıýjettik kompozıtsııalar, sonymen qatar zergerlik áshekeıler men sándik-qoldanbaly buıymdar qoıyldy. Kartınalardyń stıldik, beınelik jáne oryndaý tehnıkasy jaǵynan túrliligi Sýretshiler odaǵy ujymy sheberleriniń shyǵarmashylyq izdenisin aıqyndaıdy. Usynylǵan jańa ekspozıtsııada ulttyq ónerdi mádenı sáıkestendirý barysy aıqyn júzege asty. Kórmege K.S.Ahmetjan, A.E.Alpysbaev, Sh.E.Aıdos, T.Baıǵalıev, M.S.Baıtenov, T.B.Batanov, A.Bektas, A.A.Dinikeev, L.E.Janpeıisova, K.R.Qajekenov, A.B.Qadyrbekov, A.J.Músálimov jáne t.b. tanymal qazaqstandyq sýretshilerdiń týyndylary qoıylǵan. Kórmeniń maqsaty - «Nurly jol» baǵdarlamasyn qoldaý jáne Elbasy N.Nazarbaevtyń halyqqa Joldaýyndaǵy: «Otandy súıý - babalardan mıras bolǵan uly murany qadirleý, ony kózdiń qarashyǵyndaı saqtaý, óz úlesińdi qosyp, damytý jáne keıingi urpaqqa amanat etip, tabystaý degen sóz. Barsha qazaqstandyqtardyń jumysynyń túpki máni - osy!» sózderin iske asyrý. Shara 20 naýryzǵa deıin jalǵasady, kórmege kirý - tegin.