Astanada Nurǵısa Tilendıevtiń 90 jyldyǵyna arnalǵan kontsert ótti
ASTANA. QazAqparat - Qazaqtyń birtýma kompozıtory, dırıjer, dáýlesker dombyrashy, KSRO halyq ártisi, Qazaqstannyń eńbek sińirgen óner qaıratkeri, Qazaqstan Memlekettik syılyǵynyń laýreaty, Halyq qaharmany Nurǵısa Tilendıevtiń 90 jyldyǵyna oraı Astanada keshi ótti. Bul týraly Astana ákimdiginiń resmı saıtynda habarlady.
Qazaq mýzyka mádenıetinde óshpes iz qaldyrǵan erekshe daryn ıesine kózi tirisinde-aq "qazaq sazynyń saıypqyrany" degen ataq berilgen edi. Kompozıtordyń artynda qalǵan murasy ólsheýsiz. 400 jýyq án men romanstyń avtory, 50 astam dramalyq qoıylymǵa, 19 kórkem fılmge, 17 mýltıplıkatsııalyq fılmge, 14 derekti-hronıkalyq fılmge mýzyka jazdy. Nurǵısa Tilendıev mýzykasy M. Áýezovtiń, Sh. Aımanovtyń, Á. Tájibaevtyń pesalaryna kórik berdi. «Qyz Jibek», «Qıly kezeń», «Meniń atym Qoja», «Qarlyǵashtyń quıryǵy nege aıyr?», «Aqsaq qulan» fılmderindegi tebirentken sazdy áýenderdiń de avtory - Nurǵısa Tilendıev.
Ol qurǵan «Otyrar sazy» akademııalyq orkestri elimizdiń mańdaıaldy óner ujymy. Búginde ol ujymǵa sazgerdiń qyzy - Dinzuhra Tilendıeva jetekshilik etedi. Keshte kompozıtordyń kóptegen, halyq saǵynǵan mýzykasy oınaldy. Kompozıtordyń ánderin Roza Rymbaeva, Maıgúl Qazturǵanova, Nurǵalı Núsipjanovtar jáne «MýzArt» toby oryndady.
