Astanada «Nur shashý» atty halyqaralyq kórme ashyldy
ASTANA.KAZINFORM - Astanadaǵy HAS SANAT óner galereıasynda Qazaqstan men Qyrǵyzstan sýretshileriniń «Nur shashý» atty halyqaralyq kórmesi ashyldy. Ekspozıtsııaǵa Ásel Tileýlen, Sansyz Mırzıraımov, Abaı Nasırıdın ýýlý jáne Islam Doorovtyń 60-tan astam keskindeme týyndysy qoıylǵan.
Kórme ózegine adam janyndaǵy sáýle, ishki tazarý men rýhanı tereńdik taqyryby arqaý bolǵan. Sýretshiler bul uǵymdardy ártúrli kórkemdik máner, dara qoltańba jáne beıneleý tásilderi arqyly kórsetken. Shyǵarmashylyq ustanymdary bólek bolǵanymen, ekspozıtsııa tutastaı alǵanda jan tynyshtyǵy, úmit, rýhanı tirek jáne adam seziminiń tereń bolmysy jaıyndaǵy ortaq kórkem oıdy alǵa shyǵarady.
Kórme qatysýshylary men qonaqtaryna Qazaqstan Premer-Mınıstriniń orynbasary – Mádenıet jáne aqparat mınıstri Aıda Balaevanyń quttyqtaý haty oqyldy. Óz quttyqtaýynda Úkimet basshysynyń orynbasary mundaı jobalardyń mádenı baılanystardy nyǵaıtyp, halyqtar arasyndaǵy rýhanı jaqyndyqty tereńdete túsýdegi erekshe mańyzyn atap ótti.
– Bul kórme – zamanaýı beıneleý óneriniń tańdaýly týyndylaryn toǵystyrǵan, shyǵarmashylyq izdenis pen rýhanı sabaqtastyqty aıshyqtaıtyn taǵylymdy mádenı oqıǵa dep bilemin. Kórmege elimizdiń, sondaı-aq Qyrǵyz Respýblıkasynyń belgili qylqalam sheberleri qatysyp jatyr. «Nur shashý» kórmesi – sýretshilerdiń shyǵarmashylyq jetistikterin tanytatyn alań ǵana emes, sonymen birge mádenıetter toǵysynyń, óner arqyly rýhanı úndesýdiń jarqyn kórinisi, – delingen quttyqtaý hatynda.
Kórmege qatysýshy qylqalam ıeleri túgeldeı keskindeme janrynda eńbek etedi. Soǵan qaramastan, ár sýretshi ortaq taqyrypty ózindik tanym-túısigimen, ózine tán stıldik ereksheligimen ashady.
Mádenıet jáne aqparat mınıstrligi málimetinshe, ekspozıtsııada portret pen peızaj, abstraktsııa elementteri men ishki úılesimge qurylǵan kórkem izdenister tabıǵı sabaqtastyq tapqan.
Kórme 2026 jylǵy 11 mamyrǵa deıin jalǵasady.
Aıta keteıik, Qazaqstan alǵash ret Qytaıdyń eń iri kórmesinde bilim berý sektoryn tanystyrdy.